“Арсенал” ва “Ювентус”да порлаган футболчи фаолиятини якунлади

 Уэлс терма жамоаси аъзоси “Арсенал” ва “Ювентус” каби клубларда тўп сурган ярим ҳимоячи Аарон Ремзи футболчилик фаолиятини якунлаганини эълон қилди. 35 ёшли футболчининг сўнги клуби Мексиканинг “Пумас" жамоаси бўлди.

"Бу осон қарор эмас эди. Кўп ўйлагандан сўнг, мен футболдан кетишга қарор қилдим. Аввало, Уэлс ҳақида бир оғиз сўз айтмоқчиман. Уэлс либосини кийиш ва унда шунча унутилмас онларни бошдан кечириш мен учун улкан шараф бўлди. Бу фақат мен қўл остида ўйнаган барча мураббийлар ва мени ҳар бир қадамда қўллаб-қувватлаган барча ходимларнинг улкан ҳиссаси туфайли мумкин бўлди. Бундан ташқари, мен ўйнаш бахтига муяссар бўлган барча клубларга самимий миннатдорчилик билдираман. Орзуйимни рўёбга чиқариш ва энг юқори даражага чиқишга ёрдам берган мураббийлар ва ходимларга раҳмат. Албатта, хотиним, болаларим ва бутун оиламга катта раҳмат. Шунча йиллар давомида сизнинг қўллаб-қувватлашингизсиз, буларнинг ҳеч бири бўлмас эди",- деб ёзди Ремзи ижтимоий тармоқлардаги саҳифасида.

Эслатиб ўтамиз, Ремзи “Арсенал” билан 3 марта Англия кубогини қўлга киритди, “Ювентус” билан эса Италия чемпионати, Италия кубоги ҳамда мамлакат суперкубогига эга чиққанди.

Шунингдек, ярим ҳимоячи фаолияти давомида “Кардифф”, “Ноттингем Форест, “Рейнжерс” ва “Ницца” каби клубларда ҳам тўп сурган.

Абдувалиев Азизбек