"Арсенал" Винисиусни қўлга киритиш йўлини топди

Лондоннинг «Арсенал» клуби Мадриднинг «Реал» жамоаси ярим ҳужумчиси Винисиус Жуниорни ўз сафига қўшиб олиш режасини жиддий кўриб чиқмоқда.

HandofArsenal нашри маълумотларига кўра, бразилиялик футболчини олиш ғояси клуб ичидаги муҳокамаларда тўлиқ қўллаб-қувватланган. 

«Арсенал» раҳбарияти Винисиуснинг вакиллари билан алоқа ўрнатиб, унинг атрофидаги одамлар билан суҳбатлашган, шунингдек, эҳтимолий трансфернинг молиявий жиҳатларини ҳам ўрганиб чиққан. Шу жараёндан сўнг лондонликлар бу келишувни амалга ошириш мумкин, деган хулосага келган.

Хабарга кўра, агар Винисиус Жуниор «Реал» билан шартномани узайтириш борасида келишувга эриша олмаса, «Арсенал» 26 ёшли ҳужумчи учун катта миқдорда тўлов таклиф қилишга тайёр.

Transfermarkt портали баҳосига кўра, Винисиус Жуниорнинг трансфер қиймати 140 миллион еврони ташкил этади. Унинг «Реал» билан амалдаги шартномаси келаси йил ўрталарида ниҳоясига етади.