«Arsenal» Yildizni olish uchun «Yuventus»ga almashuv taklif qiladi

Londonning «Arsenal» klubi turinlik «Yuventus» yarimhimoyachisi, hujumkor pleymeyker Kenan Yildizni qo‘lga kiritish maqsadida braziliyalik vinger Gabriél Martinellini bitimga qo‘shish imkonini ko‘rib chiqmoqda, deya xabar bermoqda Sports.kz nashri TEAMtalk manbasiga tayanib.

Ma’lumotlarga ko‘ra, «Yuventus» 21 yoshli Turkiya terma jamoasi a’zosini sotish niyatida emas va uning transfer qiymatini 100 million yevro atrofida baholamoqda. Shunga qaramay, turinliklarning Martinelliga qiziqishi klublar o‘rtasidagi muzokaralarga yo‘l ochishi mumkin. Hozircha futbolchilarni almashish va «Arsenal» tomonidan qo‘shimcha to‘lov amalga oshirilishi ehtimoli o‘rganilmoqda.

London klubi murabbiylar shtabi Yildizni hujumning chap qanotini kuchaytirish uchun mos nomzod deb biladi. Uning bir nechta pozitsiyada o‘ynay olishi, jumladan, «o‘ninchi raqam» – markaziy hujumkor yarimhimoyachi sifatida harakat qila olishi alohida qayd etilmoqda. Martinelli esa so‘nggi mavsumda Mikel Arteta jamoasida doimiy asosiy tarkib o‘yinchisi maqomini ma’lum darajada yo‘qotgani aytilmoqda.

Shu bilan birga, hozircha rasmiy taklif yuborilmagan. «Yuventus» rahbariyati Yildizni klubning yaqin yillar uchun muhim loyihasida markaziy figura sifatida ko‘radi. Shu bois turinliklarni bunday almashuvga ko‘ndirish oson bo‘lmasligi ta’kidlanmoqda.