Arteta: "Qanday qilib penalti berilganini bolalarim ham tushunmadi"

"Arsenal" bosh murabbiyi Mikel Arteta "Brayton"ga qarshi to‘qnashuvdan so‘ng o‘z fikrlari bilan o‘rtoqlashdi. 
 
Xabaringiz bor, "to‘pchilar" Angliya Premer-ligasining 20-turidan o‘rin olgan bahsda "Brayton" bilan 1:1 hisobidagi durangga imzo chekdi. Uchrashuvning 16-daqiqasida Nvaneri hisobni ochgan bo‘lsa, 61-daqiqada Pedro penaltidan hisobni tenglashtirdi. Ispaniyalik mutaxassis esa mana shu 11 metrlik jarima zarbasi uchun o‘zining fikrini bildirib o‘tdi. 
 
"To‘g‘risini aytsam, hayotim davomida bunday ahmoqona penalti ko‘rmaganman. Xattoki, men uchrashuvdan so‘ng farzandlarimdan ham so‘radim. Ularning javob ham xuddi menikidek. Ular ham hech qachon bunday penalti berilganini eslay olishmadi. Qancha ko‘p o‘ylasam ham buni tushuna olmayapman" - dedi "kanonirlar" bosh murabbiyi. 
 
Eslatib o‘tamiz, "Arsenal" APLda 20 ta uchrashuvdan so‘ng 11 ta g‘alaba, 7 ta durang va 2 ta mag‘lubiyatga uchrab, 40 ochko jamg‘argan holda turnir jadvalining 2-o‘rinini egallamoqda.