Артета учун "Арсенал"нинг асосий трансфер нишони ким бўлиши аниқ

“Наполи” клуби форварди Дрис Мертенс “Арсенал”нинг қизиқишлар доирасига кириб қолди. Бу ҳақда The Mirror нашри хабар бермоқда.

Юқоридаги манбаага кўра 32 ёшли бельгиялик футболчининг хизматларига шахсан “канонирлар”нинг янги устози Микель Артета жиддий қизиқиш билдира бошлаган.

Таъкидлаш керакки, Мертенснинг “Наполи” билан амалдаги шартномаси жорий мавсум якунига қадар имзоланган. Шу боис неаполликлар уни қишки трансферлар давридаёқ сотиб юборишлари мумкин.

Эслатиб ўтамиз, бундан аввалроқ Мертенсга “Боруссия” Дортмунд ҳам қизиқаётгани ҳақида хабарлар тарқалган эди.

Маълумот учун, Мертенс жорий мавсум “Наполи” сафида 21 та ўйинда майдонга тушди ва ўз ҳисобига 9 та гол ҳамда 2 та голли узатма ёздириб қўйишга эришди.