Артур Мело ҳеч кимга керак эмасми?

"Ливерпуль" ярим ҳимоячиси Артур Мело жамоада қоладиган бўлди.

Футболчининг агенти Федерико Пасторелло буни "Tuttomercato" нашрига берган интервьюсида тасдиқлаган эди. Аммо унинг кейинги тақдири ҳамон сўроқ остида қолмоқда.

Гап шундаки, бразилияли истеъдод соҳибининг жисмоний ҳолати Юрген Клоппга маъқул келмади ва мутахассис уни дарҳол ортга қайтариб юбориш истагини билдирди. Бироқ битим шартларида Артур мавсумни Англияда якунлаб қўйиши белгилаб қўйилган.

Ўз навбатида, туринликлар бошқарувида фаолият олиб бораётган Массимилиано Аллегри ҳам 26 ёшли футболчига ишонч билдирмаяпти. Шу боис, Пасторелло мижозига янги жамоа топиши лозим. Унинг ўзи бу борада шундай деди:

"Агар Аллегри кейинги мавсумда ҳам "Ювентус"да қолса, биз бошқа клуб излаймиз. "Ливерпуль" шартномани узайтирса ажойиб иш бўларди",-деди агент.