Артём Петросян: "Бу муваффақиятни 2 ой кутгандик"

Пролиганинг 17-туридан жой олган "Олимпик" – "Жайхун" (3:1) учрашувдан сўнг мезбонлар бош мураббийи Артём Петросян матбуот анжуманида иштирок этди. Бу ҳақида клуб матбуот хизмати маълум қилди.

"Узоқ кутилган ғалабага эришдик. Болаларга ўйин учун раҳмат. Кўп нарса ўхшамади, оддий вазиятларда тўпни йўқотяпмиз. Учрашувни кўриб чиқиб, таҳлил қиламиз. Бу муваффақиятни 2 ой кутгандик. Футболчилар охиригача курашиб, борини бериб ўйнади. Ёш ўйинчиларимиз яна гол ураман дея, сал хатоликларга йўл қўйишди. Бироқ уларга миннатдорлик билдираман. Учинчи голни эртароқ урсак бўларди, шунда ўйин сўнгида асабийлик кузатилмасди.

- Олдинда жамоани "Олимпик-МобиУз" билан муҳим учрашув кутмоқда. Бугунги ғалаба футболчилар руҳиятига қанчалик таъсир кўрсатади?

- Ўтган ўйиндаги мағлубиятдан кейин кийиниш хонасига кирсам, ҳамма хафа эди. Ҳозир эса барча-барча хурсандлигини кўрдим. Албатта, бу ғалаба руҳий томондан ишонч бағишлайди. Ҳозирча дам оламиз ва кейин 28 октябрь кунги баҳсга тайёргарлик кўрамиз. "Олимпик-МобиУз" билан жиддий учрашув бўлади, бу – болаларга мотивация бериш ҳам шарт бўлмаган беллашув.