Асад Дўрмонов: Бой тарихга эга бўлган

Фарғонанинг «Нефтчи» клуби ўтган йили Суперлигада муваффақиятсизликка юз тутганди ва бу йил про-лигада иштирок этди. Бошида кўпчилик бу жамоани яна тезда мавқеини тиклаб кучлилар сафига қайтса керак деб ўйлашганди. Лекин амалда бундай бўлиб чиқмади. «Нефтчи» ҳаттоки учликка ҳам кира олмади ва якунда 5-ўринни эгаллади. Албатта, таркиб ёшартирилди, бир қатор ўзгаришлар бўлди. Бош мураббийлик вазифасини эса клубнинг собиқ футболчиси Асад Дўрмонов бажарди. Шу боис куни кеча ушбу мутахассис билан боғланиб, клубга тааллуқли бир қатор саволлар билан мурожаат қилдик.

- Дастлаб якунига етган мавсум ҳақида тўхталиб ўтсангиз. «Нефтчи»нинг иштироки борасида нима дея оласиз?

- Чемпионат бошида йўқ жойда очколарни йўқотдик. «Хоразм», «Истиқлол», «Оқ-тепа» каби жамоалар билан ўйинларда «Нефтчи» омадсизликка  юз тутди. Бу ҳам етмаганидек, жамоамиз таркибида анча-мунча ўзгаришлар бўлганди. Ўтган йили ўйнаган ўйинчилар Суперлигада ўйнашни хоҳлашгани учун бошқа клубларга кетишди. Улар про-лигада тўп суришни исташмади. Натижада бунгача ўринбосарлар жамоамизда ҳаракат қилиб келган йигитларни асосий таркибга ўтказдик. Уларда эса барибир про-лигада қатнашиш учун ўзига яраша тажриба ҳам бўлиши керак эди. Ўйлашимча, бошида бизга айнан мана шу жиҳат етишмади. Сафимиздаги ёшлар муросасиз учрашувларни ҳали кўришмаганди. «Нефтчи» шундай жамоаки, хоҳ уйда ёки сафарда бўлсин, доим ғалаба учун майдонга тушади. Иккинчи даврага келиб эса футболчилар ўз ўйинларига анча қўшишди. Айниқса, руҳий томонлама кучайишга эришишди. Ҳар сафар футболчиларимизга «Нефтчи» доим ғалабадан бошқа натижани ўйламаслиги ҳақида айтиб келдик. Тўғриси, иккинчи даврада йигитларимизнинг ўйинлари бир мунча яхшиланганлигини кўриб хурсанд бўлдик. Биринчи давра билан солиштирганда анча-мунча фарқ сезилиб турди. Бу ҳолат статистикада ҳам билиниб турди. Сафарда ва уйда анча-мунча ғалабаларга эришдик. Муҳими, ўйинчиларда ўзларига бўлган ишонч пайдо бўлди. Лекин футболда барибир жўжани кузда санаймиз деган гап бор. Шу нарса бизга етишмади. Ўйлашимча, бу мавсумда футболчиларимиз про-лигада тўп суриб ўзлари учун тажриба орттиришди. «Хоразм», «Истиқлол», «Машъал», «Шўртан», «Оқ-тепа» каби жамоалар анчадан бери про-лигада ўйнашяпти. Бундай жамоаларда эса про-лиганинг тажрибаси бор. Улар қандай ўйнаш кераклигини билишади. Биз эса йигитларимизни кўпроқ руҳий тарафлама кучайтиришга ҳаракат қилдик. Бу эса натижаларда ҳам ўз аксини кўрсатди деб ўйлайман. Энди уларга келаси мавсумда анча осонроқ бўлади.

- «Нефтчи» бу йил про-лигада илк бор иштирок этди. Тўғриси, жамоа қуйи лигага тушганида яна бир йилнинг ўзидаёқ мақсад жиддий бўлади ва Суперлигага қайтса керак деб ўйлагандик. Лекин якуний жадвалга қарайдиган бўлсак, «Нефтчи» юқори ўриндаги жамоаларга етарлича рақобат туғдириши қийин кечди. Натижада 5-ўрин билан чекланди. Айтмоқчиманки, «Нефтчи»нинг олдига ростдан ҳам Суперлигага қайтиш вазифаси қўйилганмиди?

- Бўлмасам-чи! «Нефтчи» шундай жамоаки, ҳамма вақт ўз олдига максимал вазифа қўяди. Биз жамоамиз билан ўзаро келишган ҳолда яна Суперлигага  қайтиш кераклиги борасида олдимизга мақсад қўйгандик. Футболда эса доим ҳам ўйлаган мақсадларингиз амалга ошавермайди. Қайсидир пайтларда эса омадимиз ҳам келмади. Айниқса, биринчи даврада бўш ўйнадик. Иккинчи даврага келиб ўйинимиз ўзгарди. Бизда доим максимал вазифа бор. «Нефтчи» Суперлигада ўйнаши керак. Шунча бой тарихи бор жамоага про-лигада қатнашиш ярашмайди. Биз албатта масадимизга эришишга ҳаракат қиламиз. Майли, бу йил бўлмадими, келаси мавсумда яна ўша мақсадимиз сари курашамиз. Барибир натижа кўрсатишимиз керак.

- Про-лигани ва айниқса «Нефтчи»ни кузатар эканмиз, четдан қараганда бу жамоа худди ҳеч кимга  керак эмасдек таассурот қолдирди. Бунинг устига клубда молиявий муаммолар ҳам кўплиги ҳақида эшитгандик. Бу борада нима деган бўлардингиз?

- Исталган клубда муаммо бор. Биз бундай нарсаларга қарамаймиз. Биринчи ўринда биз ўйин ва футбол ҳақида ўйлаймиз. «Нефтчи» қайсидир ўринни ўйлаб курашмайди, фақат максимал натижа учун ўйнайди. Биз шундай йўсинда ишладик. Тан оламан, бизда ўзига яраша муаммолар бўлди. Аммо боя айтганимдек, биринчи навбатда ўз ўйинимиз ва ўзимиз олдимизга қўйган мақсадимиз ҳақида ўйладик. Муаммо катта бўладими ёки кичикми, ҳар қандай жамоада бўлади. Суперлига клубларида ҳам мана шундай муаммолар бор. Лекин биз бундай ҳолатларни бир четга суриб қўйдик. Асосан жамоа учун қайғурдик. Ўз ўйинимиз билан мухлисларимизни хурсанд қилмоқчи бўлдик. Тўғри, «Машъал» ҳар томонлама анча кучли жамоа.

- «Машъал» ҳаққоний равишда Суперлигага чиқди, шундайми?

- Албатта, ҳаққоний чиқишди. Уларда ҳаммаси жой-жойида. Биз биринчи ўринда нима ҳақида ўйладик? Ўйин ва натижа учун ишладик. Афсуски, бу сафар ўхшамади. Энди келаси йили яна уриниб кўрамиз. Футболчиларимизда энди ўзига яраша тажриба пайдо бўлди. Барибир вақти келиб «Нефтчи» Суперлигада ўйнайди.

- Кўпчилик про-лигадаги формат ўзини оқламаганлиги ҳақида фикр билдиришди. Бундан ташқари, савия ва сифат борасида ҳам камчиликлар кўзга ташланиб турди. Сиз ҳам бундай фикрларга қўшиласизми?

- Тўғри, Суперлиганинг про-лигадан ҳар томонлама фарқи бор. Бу йил жамоамиз илк бор про-лигада ўйнади ва унинг ҳавоси, муҳитини кўрдик. Жамоани яна кучайтириш ва тайёрлаш керак. Про-лигадан Суперлигага чиқиш учун муносиб даражада бўлишимиз лозим.

- «Нефтчи»нинг Суперлигага чиқа олмагани яна мухлисларни ранжитгани аниқ ва уларда яна бир бор ишончсизликни оширган бўлса ҳам ажаб эмас.  Охирги йилларда эса бу ҳолат клубнинг мавқеига ҳам салбий таъсир қилмоқда…

- Тўғри, мухлислар ҳам ғалабаларни хоҳлашади, уларни тушунамиз. Лекин ҳаёт шунақа. Барибир мухлис ўз номи билан мухлис бўлиши керак. Ҳамма вақт жамоага мухлислик қилишлари керак. Бу – футбол. Ким ўйлабди дейсиз, «Нефтчи»да шунақа кунлар бўлади деб. Насиб қилса, вақти келиб жамоа яна порлайди. Про-лига ўйинларида жамоамизнинг ўйинларига келиб қўллаб-қувватлаб турган ишқибозларимизга раҳмат. Тўғри, улар унчалик кўп бўлмади, шунга қарамай, келганларга миннатдорчилик билдираман. «Нефтчи» Суперлигага чиқиши ва яна жамоа олдинги даврларига қайтиши керак.

- Кейинги режаларингиз қандай? Клубдаги ишингизни давом эттирасизми?

- Ҳозир ҳеч нима дея олмайман, айни пайтда таътилдамиз. Янги йилгача ҳаммасини ҳал қиламиз.

 

Фикрлар

Фикр қолдириш учун авторизациядан ўтинг!
Расулжон Тоштемиров
30/11/2019 13:06
Асад сен барибир зурсиз сенга омад ёр булсин
&
Сурхон К
30/11/2019 07:18
Асадбой шу Нефтчини кутараман деб Сурхондан кетдинглар вактида пулни кувуб. Нефтчи энди узига кемайди. Чунки уни Сурхондарёни боллари кутарганди вактида. Саркасян хам Сурхонда уйнаган. Лекин сурхон футболиун хечнима килмади. Сенга холиям кечмас каетдагин Сурхондарё футболи ун ишла. Агар хохласанг. Уёкда юрмай тугулган жойинга кает.
&
izzat.karimov
30/11/2019 02:19
Нефтчини шу ҳоладга олиб келганлар сизлар.. Ман 1992 йилдан бери кузатаман футболни қанча қарғишлар олган Нефтчи водий дербиларидаги ғиром уйинлар Навбаҳор мухлислардан нечкиши шу уйинларнидеп инфарк бўлган мен билганим 2 киши футбол пайтида оламдан ўткан юраги ёрилиб Голларни ҳисобламастан судиялар бн ютиб келгансанлар. Арани ҳоли нима бўлди Фарғонадан қандай ҳайдалди