Аср ўғрилиги

Биз сизга 39 йил олдин Испания футболида юз берган детектив воқеа ҳақида маълумот берамиз.

1981 йил 1 март санасида “Барселона” “Эркулес”ни қабул қилди. “Барса” меҳмон жамоа дарвозасига 6 та гол урди. Голлардан 2 таси Кини номи билан машҳур Энрике де Кастро Гонсалес ҳисобига ёзилди. Ўша пайтларда Кини “Барса” юлдузи Бернд Шустер билан бир қаторда турарди.

Кини “Барселона”га 1980 йилда келган эди. Каталонияликлар футболчи учун “Спортинг”га 82 млн песет тўлаганди. Бу 31 ёшли футболчи учун жуда катта миқдордаги пул ҳисобланади . Аммо Кини ўша пайтда Пичичи совринининг (Испания чемпионатининг энг яхши тўпурари) 3 карра соҳиби ва терма жамоанинг асосий футболчиси бўлган. “Барселона” футболчи учун анча пайт кураш олиб борди ва 80 йилнинг ёзида ўз мақсадига эришди. Кини “Барселона”даги 30 та ўйинида 18 та гол муаллифига айланди.

Кини “Барселона”га ўтгач, турмуш ўртоғи ва икки фарзанди Хихонда қолишганди. Улар айнан мана шу мудҳиш тунда Барселонага келишга қарор қилишганди. Кини уларни кутиб олиш учун аеропортга чиқиши керак эди. Аммо Мария ва фарзандлари оила бошлиғи уларни кутиб олиш учун аеропортга чиқмаганини кўришди. Тез орада футболчининг ташлаб кетилган машинаси топилди.

Кини машинага ўтиргач, унинг ёнига қоғоз ва ручка кўтарган икки бола келади. Футболчи бажонидил дастхат қўйиб беришга рози бўлади. Аммо шу пайт орқасидан металл буюм билан кимдир урганини ҳис қилади. Унинг ортидан келган учинчи киши фургон ортидан юришни буюради. Кини ялинишга тушади. 25 кунлик азоблар шу тариқа бошланган эди. 3 кун мобайнида полиция футболчини излайди. 4 кун эса “Барселона” офисига қўнғироқ бўлади. Улар футболчи учун 100 млн песет ва чемпионлик совринидан воз кечишни талаб қилди. “Кўк-анорранглилар” ўша пайтда “Атлетико”дан 2 очко ортда қолаётганди. Кейинги ўйин эса айнан Мадрид жамоаси билан бўлиши керак эди. “Барса” ортиқча қаршиликсиз 0:1 ҳисобида ютқазади, жамоа чемпионлик пойгасидан чекинади. Кейинги 5 та ўйинда каталонияликлар атиги 1 очкони қўлга киритишади. Бир неча кундан сўнг эса “Барселона” иккинчи шартни ҳам бажаради. Аноним ҳисобга талаб қилинган пул ўтказилади. Фақатгина банкга ўша пулни олиб кетувчиларни кутиш қолган эди, холос. Жиноятчи банкка келган пайтда полиция уни қўлга олди.  Сўроқдан сўнг у ўз шериклари Сарагосадан узоқда бўлмаган Арагонда яширинганини ошкор қилади. 25 март санасида полиция гаражни ўраб олди. Жиноятчилардан бири қаршилик кўрсатишга уринди ва воқеа жойида отиб ташланди.  Иккинчиси эса қўлга олинди. Гараж ичидаги ўрадан эса умуман таниб бўлмайдиган аҳволга келиб қолган Кинини олиб чиқишди.

Улар Кинини ўрага ташлаб қўйишганди. Ҳар куни битта бутерброд ва бир стакан сув беришган. Гаражда Кинига ёқадиган Хулио Иглесиаснинг қўшиқлари янграрди. Дастлабки кунларда футболчини уришган, ўлим билан қўрқитишган. Улар футболчини “Барселона”га ўтганини ҳазм қила олишмаган. Уни сотқин дея аташган.

Бутун Испания футболчини излаш билан овора бўлди. Эрталабки хабарлар изсиз йўқолган футболчи ҳақида бўлар эди. Унинг озод этилиши бутун Испанияни хурсанд қилди. Барселонада Кинини ўттиз минг мухлис кутиб олди.

Жиноятчилар эса 10 йилга озодликдан маҳрум этилди. Суд етказилган зарар учун жиноятчилардан 5 млн ундириш ҳақида қарор чиқарди, аммо Кини бу пулларни олишдан бош тортди. У инсонпарварлик кўрсатди.Суд залида ҳам уларга қарши кўрсатмаларда эҳтиёткорлик билан жавоб берди. Ўлдирилган жиноятчининг оиласига ёрдам берди. Кини ўзи умуман суд ўтишига қарши бўлган. Озод қилинганидан ўн кун ўтгач, Энрике майдонга қайтди.

Кини “Вальядолид”га қарши ўйинда 90 дақиқа ҳаракат қилди. Кейин эса “Альмерия”га 2 та тўп киритди. 25 кунлик азобли кунлар унинг тўртинчи марта Пичичи совринини қўлга киритишга тўсқинлик қилмади. Мамлакат Кубогида эса собиқ жамоаси “Спортинг” устидан ғалаба қозониб совринни қўлга киритди. Ўша ўйинда Кини дубльга эришди.

Кейинги мавсум эса янада яхшироқ бўлди. Кини 26 та гол муаллифига айланди. Кини “Барселона”даги 4 йилдан сўнг Хихонга қайтди. Хихонликлар уни яхши кутиб олишди. У ерда ҳам 3 йил тўп сурган Энрике 37 ёшида фаолиятини якунлади.