Асрор Алиқулов: "Рақиб "Нефтчи" бўлишига қарамасдан майдонга ғалаба учун тушдик"

Cуперлиганинг 26-туридан ўрин олган “Шўртан” - “Нефтчи” (0:2) учрашувидан кейин ўтказилган матбуот анжуманида мезбонлар бош мураббийи Асрор Алиқулов қатнашди.

- Рақиб “Нефтчи” бўлишига қарамасдан майдонга ғалаба учун тушдик. Ўйинни яхши бошладик, десам хато бўлмайди. Позицион ҳужумлар қилишга ҳаракат қилдик. “Нефтчи” кўпроқ яхши ҳимояланади, қарши ҳужумга таянади. Яхши футболчиларга эга. Аста-секин “Нефтчи”га имкониятни бериб қўя бошладик. Барибир ўйинчилар ҳаракат қилишди. Шунинг учун уларга миннатдорчилик билдираман.

- Нарзуллаевнинг йўқлиги жамоа учун катта йўқотиш. Ўрнини қанчалик тўлдира оласиз?

- Қийин ҳолат эди. Нарзуллаевни ўрни баланд. Голлар киритиш ва ҳужумда ҳам ўрни катта. Қийналдик, айрим футболчиларни синаб кўрдик. Аброр Тошқўзиевда тўхтадик. Бошқалари ёш, ҳали бу савияда қийин, рақиб эса “Нефтчи”. Барибир Дониёр Нарзуллаев бўлганида биз ишончлироқ ўйин кўрсата олардик, деб ўйлайман.

- Одил Абдумажидов қайдномада йўқ эди. Нима бўлди?

- Унда кичик жароҳат бор. Шу боис ҳозирда жароҳатини тиклаяпти. Яқин кунларда қайтади, деб ўйлайман. Жароҳати борлиги учун қайдномага киритмадик.