«Атлетико» ҳужумчисини 150 миллионга сотишга тайёр

«Атлетико» ҳужумчи Хулиан Альваресни сотиш бўйича таклифларни кўриб чиқишга тайёр. Мадрид клуби раҳбарияти унинг трансфери учун камида 150 миллион евро талаб қилмоқда.

Альваресга энг жиддий даъвогарлардан бири сифатида «Арсенал» тилга олинмоқда. Шу билан бирга, «Атлетико» раҳбарлари лондонликлар бундай юқори миқдорни таклиф қилиши қийин, деган фикрда.

Шуниси қизиқки, ҳужумчининг «Барселона» ёки «Реал» сафига ўтиши варианти мутлақо инкор этилган.

Илгарироқ «Реал» июнь ойида футболчига қизиқиш билдиргани ҳақида хабарлар тарқалган эди. Хулиан Альварес эса клуб раҳбарияти билан суҳбатда ўзининг «Барселона»га ўтиш истагини очиқ айтган. «Арсенал» билан эҳтимолий келишув ҳам фақат футболчининг шахсий розилигидан кейингина амалга ошиши мумкин.

Эслатиб ўтамиз, Жаҳон чемпионати–2026 пайтида Аргентина терма жамоаси ҳужумчиси омма олдидаёқ ҳозирги клубини тарк этиш нияти борлигини маълум қилган эди.