"Айрим ўйинчиларнинг талабини бажара олмадик. Бу очиқ гап" - Рўзиқул Бердиев иштирокида қизиқарли матбуот анжумани

“Насаф” клуби чемпионатнинг дастлабки турини ўз уйида “Олимпик” жамоасига қарши ўтказиб 2:0 ҳисобида устун келди. Учрашувдан кейин “Насаф” бош мураббийи Рўзиқул Бердиев матбуот анжуманида журналистларнинг бир қатор қизиқтирган саволларига жавоб қайтарди.

- Ғалаба билан табриклаймиз. Аввало, учрашув борасидаги фикрларингиз.

-Табрик учун раҳмат. Мен ҳам мухлисларни табриклайман. Йигитларга миннатдорчилик билдирдик. Бугунги учрашувни яхши, ҳужумкор бошладик. Биринчи бўлим ўрталарига келиб ўйинимизда озгина пасайиш бўлди. Буни “Олимпик” жамоасини тўпни яхши назорат қилгани билан боғласак бўлади. Чунки “Олимпик” кўпроқ шу нарсага эътибор қаратди ва қарши ҳужумларга. Биз иккинчи бўлимда баъзи-бир ўзгаришларни қилдик. Ушбу ўзгаришлар ғалабамизга асосий сабаблардан бўлди, деб ўйлайман. Керак пайтда ҳимояландик ва керак пайтда ҳужумга эътибор қаратдик. Лекин асосийси, бугун об-ҳавони ҳолатини ҳисобга олиб стандарт вазиятларда яхшироқ ҳаракат қилишимиз керак эди. Бўйдор ўйинчиларимиз бор эди, аммо бу биз кутгандек яхши амалга ошмади. Асосийси, ғалабага эришдик.

-  Ислом Кенжабоев ва Ойбек Бозоровни қачон сафга қайтиши маълум бўлганми?

- Бозоровни жароҳати биринчи ўйин билан боғлиқ бўлди. Елкасидан жароҳат олди ва енгил операция ўтказди. Ўйлайманки, икки ҳафталарда қайтади. Ўзи эса тезроқ қайтишга жуда шошиляпти. Режамиз бўйича икки ҳафта кетади, балки 2-3-турларни ҳам ўтказиб юборар. Кенжабоевга келсак, шифокорларни бизга айтишича, у ҳеч қандай машғулотсиз бир ой жароҳатини даволаши керак эди. Ўша муддат ўтяпти. Ўйлайманки, Кенжабоев яқин ораларда қайтади. Шерзод Насруллаев терма жамоада жароҳат олди ва бизга қайтиб келганидан кейин ҳам яна бўлди. Жароҳатини тузатишга ҳаракат қиляпти. Кўриниб турибдики, уларни йўқлиги сабабли айрим ўзгаришларни қилишга мажбур бўляпмиз ва ўйинимизга таъсир кўрсатяпти. Шунга қарамай, ҳар бир баҳсга имкониятимиздан келиб чиқиб бор ўйинчиларимиздан фойдаланишга ҳаракат қиляпмиз.

- Да Силва иккала голга ҳам ассистентлик қилди. Уни иккинчи таймда туширдингиз. Ўйин бошидан туширишингиз мумкинмиди?

- Да Силвани икки кун олдин бу ўйинга асосий таркибга киритиш режамизда бор эди. Нима учун икки кун олдин? Кеча қор ёққани учун ва бугун курашларга бой ўйин эди ва техникага таянадиган футболчилар зарур бўлмагани боис уни захирада қолдиргандик. Кўрдинглар, у яратувчан, ўзи ҳам яратади. Ўйинимизга кўникиб боряпти. Ўйлайманки, ҳали жамоамизга кўп ёрдами тегади.

- Мавсум аввалидаги учрашувда вилоят ҳокими кўпчилик “Насаф” чемпион бўлишини хоҳлаётгани ҳақида гапирди. Умуман, бу йил қандай вазифа қўйилди ва “Насаф”ни чемпион бўлиши учун барча жабҳада ҳамма нарса етарлими?

- Олдимизга аниқ вазифа қўйилди. Ҳар йили юқори ўринлар учун курашганмизу, лекин чўнтагимизда олтин медал йўқлиги учун шу нарса асосий мақсад бўлиб турибди. Раҳбарият бу ҳақида гапиряпти. Ўзимизнинг ҳам мақсадимиз шу. Ҳар йилги ўйинларимиз, натижаларимиз кўрсатаётгандики, бизга озгина нимадир етишмаётганди. Ким чемпион бўлиши фақатгина мавсум охирида ҳал бўлади. Лекин биз ҳаракат қилишимиз лозим. Бунга имкониятимиз бор, таркибимиз яхши. Аммо олдин айтганимдек, таркиб яхши бўлгани билан меҳнат қилмасангиз ҳеч нимага эришиб бўлмайди. Шунинг учун ҳаммасини бирлаштиришимиз, ўйинимизни яхшилашимиз керак. Албатта, бу нарса баъзи футболчиларимизга босим юклаётган бўлиши мумкин. Лекин, ўйлайманки, жамоамизда барча бунга руҳан тайёр. ОЧЛдаги ўйинимизда ҳам потенциалимиз анча юқори эканини кўрсатдик. Агар Ойбек, Шерзод ва Ислом бўлганида балки ОЧЛда ҳам натижамиз бундан-да, яхшироқ бўларди. Чунки ўша учрашувларда захирадан футболчилар тушишганида ўйинни кучайтира олишмади. Бу ҳам ўйинимизга таъсир қилди. Айнан Бозоров, Кенжабоев кабилар ўша учрашувда жуда зарур эди, қарши ҳужумларда. Бор имкониятимиздан фойдаланамиз.   

- Кўпчилик “Насаф”ни таркибини “қутурган” деб аташмоқда. Таркибдан қанчалик кўнглингиз тўлди? Ўзингиз ўйлаган футболчиларни олиб кела олдингизми?

- Йўқ, мен “қутурган” деган гапларга қўшилмайман. Биздаги ўйинчилар бир ўзи ҳал қиладиган эмас. Бир ўзи ҳал қиладиган футболчиларни олиб келишга имкониятимиз ҳам йўқ. Шу боис жамоавий ўйинга эътибор қаратишимиз керак. Нимага эришган бўлсак, ҳаммасига жамоавий ўйин орқали эришганмиз. Тўғрисини айтаман, айрим терма жамоа футболчиларини ҳам таклиф қилгандик. Ўзимизга яқин, билган ўйинчиларни. Бироқ уларни ололмадик. Баъзилари бошқа жамоага кетди, баъзилари келмади. Яна айримларини айтган талабини қилиб бера олмадик ҳам. Бу очиқ гап. Лекин биз бундан-да, кўпроқ ўйинчиларни таклиф қилгандик. Айрим трансферлар амалга ошмади. Бу йил биринчи даврагача таркибимиздаги мавжуд ўйинчилардан фойдаланамиз.  

- Ўша таклиф қилинган футболчилар кимлар эди? Ҳеч бўлмаганда биттасини жамоатчиликка айтинг...

- Яширадиган жойи йўқ, буни ҳамма биларди – Одил Ҳамробековни хоҳладик. Ўзига ҳам алоқага чиқдик. Фарруҳ Сайфиевни ҳам истагандик. Ҳаммасини айтиб ўтирмайлик, нимадир бўлди ва улар бошқа клубларни танлади. Сизга иккитасини айтдим, бундан ташқари бошқа футболчилар ҳам бор эди. Ўзимга яқин бўлган футболчиларни айтдим, бошқаларни айтмай қўя қолай. Чунки улар ҳозир мени гапимдан хафа бўлишмайди (кулади).

- Доим янги ва ёш ўйинчиларни кашф этиб келгансиз. Бу йил қайси футболчини кашф қилиш режада бор?

- Сизларга бир нарсани айтай: охирги йилларда Зафармурод, Алибек, бу йил Муродни ҳам жалб қиляпмиз. Тўғриси, катта ўйинчиларни олганимиз учун ёшларга бироз эътиборимиз камайганди. Олдимиздаги мақсад ОЧЛдаги иштирок, Кубокларни ютиш ва чемпионлик эди. Шу сабабли каттароқ ўйинчиларга урғу бергандик. Биласизми, нимани айтишим керак: ўринбосарлар таркибига ўзим бошчилигимда 2005 ва 2006 йилларда туғилган йигитларни кўпроқ ўйнатишга урғу беряпмиз. Академиямиздан 2006 йиллардаги болалардан 10 га яқинини ўринбосарлар жамоамизга таклиф қилдик. Ўшаларни кўпчилик эртанги ўйинларимизда ҳам қатнашишади. Таркибимиз ҳозирда каттароқ футболчилардан иборат бўлса, ёшлар жамоамизни янада ёшартиряпмиз. Бу ҳам керакли нарса.

- “Насаф” навбатдаги турни Тошкентда “Пахтакор” билан ўтказади. Ҳар иккала жамоанинг имкониятларини қандай баҳолайсиз?

- “Пахтакор” ҳар қандай ҳолатда ва ҳар қандай таркиб билан ҳам “Пахтакор”! Чемпион жамоа. Сафарда ўйнаймиз, бу осон бўлмайди. Бироқ охирги йилларда “Пахтакор” билан ўйинлардаги кўрсатгичимиз ёмон бўлмаяпти. Бу учрашувда ҳам ижобий натижа учун максимал курашамиз. Муҳим учрашувлардан бири бўлади.

- Мурод Раҳматов 6-рақамда ўйнаяпти. Уни ушбу рақамни танлашида сизни ташаббусингиз қай даражада? Бир пайтлар сиз ҳам 6-рақамда тўп сургансиз.

- Олдин ҳам сўрашарди. Баъзи-бир футболчиларни ўзи шу рақамда ўйнашга ташаббус кўрсатишади. Масалан, Азиз Ғаниев шу рақамда ўйнашни сўраган. Унга олавер, ёқса ўйнайвер деганман. Ҳозир шу рақам бўш экан Мурод ҳам олди, ўйнаяпти. 6 менинг рақамим демайман. Ким хоҳласа ва муносиб бўлса, ўйнайверсин.