Азим Аҳмедов: Легионерлар ва маҳаллий футболчилар ўртасида келишмовчилик чиққани ҳақидаги хабарлар ёлғон

Сўнгги пайтларда мухлислар орасида ва ижтимоий тармоқларда  "Навбаҳор" жамоасига оид турли фикрлар янграмоқда. Жамоа аҳил эмаслиги ҳамда маҳаллий ва легионер футболчилар ўртасида бўлиниш бор эканлиги иддао қилинган ушбу хабарлар ҳақиқатга мос эмас, дея хабар бермоқда клуб расмий сайти.

Ушбу гап-сўзларга “лочинлар”нинг тажрибали футболчиси Азимжон Аҳмедов ўз фикрларини билдириб, жумладан, шундай деди: 

"Мухлислар орасидаги ва ижтимоий тармоқлардаги жамоамиз борасидаги гап-сўзларнинг бари асоссиз. Бизнинг, яъни маҳаллий футболчиларнинг легионерлар билан муносабатимиз аъло даражада. “Навбаҳор”да  ҳеч қандай бўлиниш йўқ ва жамоамиз аҳил-иноқ.

Бунинг исботи сифатида мухлислар бизнинг ўйинларни томоша қилишсин.  Мухлислардан илтимос, бизни доимо қўллаб-қувватлаб туришсин. Биз эса доимо уларнинг ишончларини оқлашга ҳаракат қиламиз", - деб Аҳмедовнинг сўзларини келтириб ўтди клуб расмий сайти.