Азизжон Ғаниев: Эронга қарши ўйинда Ўзбекистон ОТЖ 50 фоиз ўйинини кўрсатди
Хабарингиз бор, айни кунларда Таиландда U-23 Осиё чемпионати баҳслари ўтказилмоқда. Ушбу мусобақани Ўзбекистон олимпия терма жамоаси Эронга қарши ўйин билан бошлади.
Учрашувда гарчи вакилларимиз Исломжон Қобиловнинг пенальтидан киритган голидан сўнг ҳисобни очган бўлишса-да, иккинчи таймда ўз дарвозаларидан гол қўйиб юборишди.
Беллашувдан сўнг терма жамоамиз вакили Азизжон Ғаниев ЎФА матбуот хизматига мусобақа, Эрон билан ўйин ва навбатдаги турлар борасида ўз фикрларини билдириб ўтди.
U-23 Осиё чемпионатининг энг қиммат ўйинчилари Топ-10 рўйхатидан ўзбекистонлик футболчи ўрин олди (Фото)
- Эронга қарши ўйинда Ўзбекистон ОТЖ ўзининг нечи фоиз имкониятини намойиш этди?
- Эрон билан баҳсда ўзимиз кутган ўйинни кўрсата олмадик. Буни футболчилар, мураббийлар ҳам айтиб ўтишди. 50 фоиз ўйинимизни кўрсатдик. Дастлабки учрашув қийин бўлдими, ҳаяжонми, билмадим. Мана Япония ҳам мағлубиятга учради. Бошқа жамоалар ҳам ҳали ўз имкониятларини тўлиқ намойиш этмади. Худо хоҳласа кейинги турда юз фоизлик ўйинимизни кўрсатиб, мухлисларни хурсанд қиламиз.
- Демак, турнир давомида жамоамиздан ўсишни кутсак бўлади, шундайми?
- Албатта, ҳали ишқибозларга ёқадиган ўйинларимизни кўрсатиб, ғалаба қозонамиз.
- Об-ҳаводан келиб чиқиб, кейинги беллашувлар учун вақт етарликми?
- Навбатдаги баҳсга тикланиш учун вақт етарлик. Шу боис эрталабдан енгил машғулотларни бошладик. Кечқурун Хитой терма жамоасининг ўйинини ва ўзимизнинг аввалги турдаги хатоларимизни кўриб, хулоса чиқарамиз.
- Эрон билан беллашувда ғалабани ушлаб қолиш учун жамоамизга нималар етишмади ва навбатдаги турлардан олдин қайси жиҳатларимизни кучайтиришимиз керак?
- Форслар бизни анча яхши ўрганиб чиқишган экан. Узун пасларимизни ҳам билиб олишганлиги боис футболчиларга ўйнашга имконият беришмади. Энди кейинги турда услубимизни бироз бошқачароқ қилиб, кутилмаган тактика орқали ижобий натижа кўрсатамиз.
- Гуруҳдан чиқиб олсак, мухлислар ўйлаётганидек уёғи осон кечармикин ёки Осиёда жамоаларнинг даражаси тенглашиб қолдими?
- Мусобақада кучли жамоалар жамланган. Гуруҳдан чиқсак, Олимпиада йўлланмасини қўлга киритиш учун охиригача курашамиз. Насиб қилса, мухлисларни хурсанд қиламиз.
Фикрлар
Tailandda start olgan Tokio—2020 Olimpiadasiga yo‘llanma beruvchi Osiyo chempionati ilk turida O‘zbekiston termasi Eron bilan 1:1 hisobida durang qayd etdi.
Uchrashuvda terma jamoamizdan o‘yin borasida ko‘p narsa kutgandim deya olmayman. Ammo muxlis sifatida men ham g‘alaba kutganim rost. Har holda 2019-yil sentabrida Toshkentdagi (bittasi Olmaliqda) o‘rtoqlik o‘yinlarida Drulovich shogirdlari forslarni ishonchli tarzda mag‘lub etgani kutish uchun bir sabab bo‘lsa, uning amaldagi chempionligi ham bir sabab edi-da.
Musobaqaning ilk turi hech qachon oson kechmagan. Biroq vazifa Tokio—2020 ga yo‘l olish kerak ekan, xoh birinchi xoh oxirgi o‘yin bo‘lsin, har qanday raqibni yutish shart bo‘ladi. O‘zbekiston “o‘lim guruhi”da. Biroq bu ham bahona uchun sabab emas.
Boshqalarni bilmadim-u, ammo terma jamoa o‘yinida Drulovichning imzosi ko‘rindi. Futbolchilar erkin, o‘zlari xohlagandek o‘ynashga harakat qildi. Albatta, murabbiy bunga ruxsat bergani diqqatga sazovor. Biroq bu o‘z samarasini bermadi. Ko‘p holatlarda to‘p juda tez yo‘qotildi. Buning uchun Jasur Yaxshiboyevning to‘pni yo‘qotib qo‘yaverganini esga olish kifoya. Qanot himoyasida harakatlangan Alijonovlar esa o‘zlaridan kutilgan o‘yinni namoyish qila olgani yo‘q. Darvozabon borasida ham o‘yin davomida xavotirlar bo‘lib turdi. Eronliklarning jismoniy jihatdan baquvvatligi va o‘ta zich himoyaviy o‘yini O‘zbekistonning hujumlarini to‘sdi, to‘xtatib qo‘ydi. Umid qilamiz, Xitoy va Koreyaga qarshi bahsda bunday bo‘lmaydi.
Uchrashuv haqida qanday tahlil, munosabat va tanqidlar bo‘lmasin, u haqida so‘zlovchi eng yaxshi vosita bu — stastika.
Oʻzbekiston — Eron (1:1) uchrashuvi stastikasi esa quyidagicha ko‘rinish oldi
O‘zbekison—Eron
Gollar: 1-1
Zarbalar: 9-16
Aniq zarbalar: 2-3
Bloklangan zarbalar: 2-5
Zarbalar aniqligi: 22,2%-18,8%
Paslar: 497-271
Uzun paslar: 43-71
Paslar aniqligi: 87,1%-67,9%
Krosslar: 8-19
Krosslar aniqligi: 25%-36,8%
Toʻp bilan muomala: 63,8%-36,2%
Offsayd: 0-1
Burchak toʻpi: 1-4
Qoida buzish: 11-11
Navbatdagi o‘yin 12-yanvar kuni Xitoyga qarshi kechadi. Mazkur o‘yinda g‘alabadan boshqa natija O‘zbekistonning guruhdan chiqish imkoniyatini keskin pasaytirib yuboradi. Unday bo‘lmasligini esa 33 mlndan oshgan O‘zbekiston xalqi juda ham xohlaydi.