БАА терма жамоаси бош мураббийи: "Ўзбекистон Осиёдаги энг кучли терма жамоалардан бири"

Хабарингиз бор, эртага Ўзбекистон терма жамоаси Бирлашган Араб Амирликларига қарши Абу-Дабидаги “Ал-Наҳян” стадионида майдонга тушади. 

Мазкур беллашув олдидан БАА терма жамоаси устози Космин Олариунинг фикрлари билан танишиб чиқишингиз мумкин.

— Бизни бу гуруҳдаги энг яхши жамоалардан бирига қарши ўйин кутиб турибди. Биз бу ҳафта мазкур ўйинга анча тайёргарлик кўрдик. Бу катта ўйин ва катта жанг. Биз ишонамиз ва охиригача курашамиз.  

— Мен бу ерга ёрдам бериш учун келдим. Жаҳон чемпионатига чиқиш бу терманинг орзуси ва бу орзу амалга ошиши учун катта иштиёқ билан ёндашиш керак. Ўзбекистон Осиёдаги энг кучли терма жамоалардан бири, аммо мен карьерам давомида жуда кўп кучли термаларни кўрганман. Бу оддий ўйин бўлмайди. Биз жанг қиламиз. Менга футболчилар қаерда ўйнаши қизиқ эмас. “Ал Айн”, “Шаржа” ёки бошқаси. Ким ўйнашга муносиб бўлса, ўша ўйнайди.