Баҳром Абдураҳимов: "Ҳа, таклифлар бор. Аввало, "Насаф" билан гаплашаман"

“Насаф” клубининг энг меҳнаткаш ва тиниб-тинчимас футболчиларидан бири – бу Баҳром Абдураҳимов. Ярим ҳимоячи шундай характерга эгаки, агар у ўз ўйинини кўрсатадиган бўлса, ҳеч ким тўхтата олмай қолади. Эътибор берган бўлсангиз, рақиблар ҳам асосан Абдураҳимовни йиқитиб қолишдан бошқа илож топа олмай қоладилар.

Баҳром Абдураҳимов ҳаётда камтар ва камгап. Аниқроғи, матбуотда доим ҳам кўриниш беравермайди. Шунинг учун бу ўйинчи интервью беришни хушламайди. Ҳамкасбларимиз ҳам Абдураҳимов билан суҳбатлашишни хоҳлашадию, бироқ футболчи доим рад жавобини бериб келади. Камина ҳам кўпинча ундан интервью олиш истаги ҳақида айтганимда кейинроқ деб ортга суриб келарди. Ниҳоят, бу сафарги мавсум тугагач, таклифимизга кўнди. Лекин камгаплиги суҳбат жараёнида сезилиб турди.  

- Ростини айтиш керакки, сизни суҳбатга кўндириш жуда қийин кечди. Нима учун ўзингизни ОАВдан олиб қочасиз?

- Билмадим, нимагадир шунақа. Ўзи охирги марта интервьюни сизга бергандим, адашмасам.

- Баҳром, фаолиятингизда “Насаф” бошқача аҳамият касб этади. Рўзиқул Бердиев сиздан қандай фойдаланишни яхши билади ва футболчи сифатида сизни анча шакллантира олди. Бу борада нима деган бўлардингиз?

- Биринчи бўлиб Рўзиқул Бердиев чақирганида ўйланмасдан рози бўлгандим. Ўша пайтда “Насаф”да Артур Геворкян, Эркин Бойдуллаев, Ботир Қораев ва яна бошқа маҳоратли футболчилар тўп суришарди. Албатта, мени шу даражага чиқишимда Бердиевни ҳиссаси катта бўлди.

- “Насаф”нинг бу йилги натижаларидан қаршиликлар хурсанд. Сиз учун ҳам барчаси қониқарлими ёки нимадандир кўнглингиз тўлмадими?

- Ҳа, албатта. Бу йил олдингисидан анча яхши бўлди. Суперкубок ва Ўзбекистон Кубогини қўлга киритдик. Шундай экан, мен учун ҳам яхши ўтди.

- “Насаф” билан шартномангиз ҳам тугаяпти. Режангиз қандай? Келаси йили ҳам бу ерда қолмоқчимисиз ёки кетасизми?

- Ҳа, “Насаф” жамоаси билан шартномам тугаяпти. Тўғриси, ҳозир бирор нима дея олмайман. Барчаси энди ҳал бўлади.

- Билишимча, сизга бир қатор таклифлар бор. Қайси жамоалар қизиқиш билдиришмоқда?

- Ҳа, таклифлар бор. Аввало, “Насаф” билан гаплашаман. Кейин бошқаларни кўриб чиқамиз.

- “Андижон” клуби орқали катта футболга кириб келгансиз. Собиқ клубингизга қайтиб фаолиятингизни ўша ерда тугатиш ниятингиз борми?

- Ҳа, худди шундай. “Андижон” жамоаси орқали катта футболга қадам босганман. Тақдиримизда яна ёзилган бўлса, “Андижон”да ҳам ўйнарман.

- 35 ёшдасиз. Аммо кўринишингиздан ўхшамайсиз. Майдонда ҳам ҳамон ёшлардек тез ва чаққонсиз. Ҳали бери тугатиш ҳақида ўйламаяпсизми?

- Тўғри, кўпчилик шунақа дейди. Ҳали кучим бор. Фаолиятимни тугатиш ҳақида ўйлаётганим йўқ.

- “Насаф” барча совринларни ютди, фақат чемпионликдан ташқари. Нега чемпионликка сира эриша олмаяпти? Бу борада нима деган бўлардингиз?

- Ҳақиқатан “Насаф” ҳамма совринларни ютди. Худо хоҳласа, кейинги йили орзиқиб кутилган чемпионликка эришади.

- Сиз учун бу йил энг яхши мураббий ва футболчи ким бўлди?

- Рўзиқул Бердиев билан Аббос Файзуллаев.

- Фаолиятингиздаги қайси қарорингиздан ҳалигача афсусланасиз?

- Бунақа афсусланадиган нарсам йўқ.

- Футболдан кейин ўзингизни қандай тасаввур қиласиз? Футболда қоласизми ёки...

- Ҳали ўйлаб кўрмадим. Футбол соҳасида қолсам керак, яна билмадим. Барчасини вақт кўрсатади.

Шуҳратбек Жўраев.