Балогуннинг четлатилишини ким бекор қилгани маълум бўлди. У Трамп эмас

Жаҳон чемпионати‑2026 олдидан АҚШ терма жамоаси ҳужумчиси Фоларин Балогунга қўлланилган автоматик дисквалификацияни бекор қилиш бўйича қарорни ФИФА интизом қўмитаси раиси Мохаммед аль‑Камали (БАА) якка ўзи қабул қилгани маълум бўлди.

Манбаларга кўра, у ушбу қарорни чиқариш жараёнида қўмитанинг қолган 17 нафар аъзоси билан маслаҳатлашмаган. Эслатиб ўтамиз, Балогун 1/16 финал босқичида Босния ва Герцеговина термасига қарши ўйинда (2:0) тўғридан‑тўғри қизил карточка олган эди. Амалдаги қоидаларга биноан, у навбатдаги ўйинни ўтказиб юбориши керак эди. Бу беллашувда АҚШ Белгияга қарши майдонга тушиши белгиланган эди.

Шунга қарамай, ФИФА автоматик дисквалификацияни вақтинча тўхтатиб, футболчига бир йиллик синов муддати белгилади. Шу сабабли Балогун 1/8 финал учрашувида асосий таркибдан жой олди ва 90+2‑дақиқада майдонни тарк этди. Ушбу ўйинда АҚШ 1:4 ҳисобида мағлуб бўлди.

Аввалроқ АҚШ президенти Дональд Трамп Балогуннинг дисквалификацияси масаласини қайта кўриб чиқишни сўраб ФИФАга мурожаат қилганини маълум қилган эди.