Бақоев учун жиддий бош оғриғи: "Сўғдиёна" уч йўлдан бирини танлаши лозим

Кечагина "Сўғдиёна" клуби ОФК Кубоги ҳудудлараро ярим финал босқичидан ўрин олган учрашувни ўтказди. Бақоев шогирдлари "Истерн"ни мағлуб этиб, Жиззах футболи тарихидаги илк халқаро ўйинда мухлисларни хурсанд қилди. Бу орқали "бўрилар" ўзи курашни давом эттираётган учинчи турнирда ҳам чемпионлик имкониятини яхшилаб олди. Энди жамоа Ўзбекистон Суперлигаси, Кубоги ва ОФК Кубогидан бирини танлаши лозим. Нега? Қуйида сизга бунинг бир нечта сабабини келтириб ўтаман.

Биринчидан, жиззахликларнинг таркиби у қадар кенг эмас. Таркибда чемпионлик учун курашишга қодир 11-12 футболчи бор холос. Айтайлик, кеча кузатганимиздек Митрович, Чермель, Колакович, Қулматов, Жўрабеков, Шайкулов, Насриддинов, Саломов, Ҳасанов, Қаҳрамонов ва Норхонов беллашувни асосий таркибда бошласа, захирада ёш Ҳалилов, деярли югурмай қўйган, фақатгина улкан тажрибаси орқали кроосларига суянаётган Денисов ҳамда ўз даражасида ўйнай олмаётган Ғофуров қолади. Бошқа футболчиларнинг ўйини чемпионлик учун курашишга етмайди, назаримда. Умуман олганда, ўйинни илк дақиқалардан бошлаётганлар орасида ҳам барча бирдек эмас. Биргина мисол "Истерн"га қарши баҳсда Насриддинов бир неча бор хатога йўл қўйди, Саломов эса чарчаб қоляпти. Хуллас, 3 та фронтда кураш олиб боришга тўсқинлик қиладиган биринчи ва энг катта тўсиқ бу - таркибдаги муаммолар.

Иккинчидан, рақибларнинг даражаси ҳам кўп нарсани ҳал этиб беради. Боиси, "Сўғдиёна"га қарши ҳам чемпионат, ҳам кубокда "Навбаҳор" ва "Насаф" курашмоқда. Шунингдек, "Пахтакор" (Суперлигада) ҳамда АГМКни (кубокда) ҳам эсдан чиқармаслик шарт. Халқаро майдонда эса, Ҳиндистоннинг "Моҳун Баган"и ва Малайзиянинг "Куала Лумпур Сити" жамоаларидан бири вакилларимиз билан ярим финалда тўқнашади. Менимча, рақибларнинг иккиси ҳам чемпионатимиз грандлари даражасида ўйин кўрсатмайди. Мисол учун, "Насаф" ўтган йили ҳиндистонликлар дарвозасига жавобсиз 6 та гол урганди, малайзияликлар айни пайтда мамлакат биринчилигида 5-ўринда бормоқда. Қанчалик ғалати эшитилмасин, бугунги кунда Суперлигани ютиш ОФК Кубоги ғолибига айланишдан қийинроқ масала бўлиб турибди.

Учинчидан, мухлислар фактори ўз сўзини айтиши мумкин. Бақоев раҳбарият олдига халқаро турнир вариантини илгари суриши эҳтимолга яқин. Негаки "бўрилар" ярим финални Жиззахда ўтказади. Агар вакилларимиз 5 октябрь куни бўлиб ўтадиган қарама-қаршиликда ғолиб бўлса, финал ҳам айнан юртимизга берилади. Кеча жиззахлик мухлислар стадионни деярли тўлдирди, кейинги баҳсларда томошабинлар ташрифи бундан-да кўпроқ бўлиши аниқ. Бу фактор ҳам жамоа бор эътиборини бир нуқтага қаратиши лозимлигини англатади.

Тўртинчидан, футболчилар концентрациясига ҳам кўп нарса боғлиқ. Масалан, жамоа бор эътиборини Суперлигага қаратиб, икки кубок ўйинларида асосий таркибга дам берилсаю, ички чемпионатда кўзланган мақсадга эришилмаса, мавсум бутунлай омадсиз ўтган ҳисобланади. Бу якунда катта норозиликка олиб келиши ҳам ҳеч гап эмас. Аксинча ҳолат билан ҳам худди шундай. Менимча, бу вазиятда ("Сўғдиёна"ни камида 11, кўпи билан 13 та ўйин кутиб турибди) Бақоев таваккал қилмаслиги керак. Суперлига олтин медали учун жуда катта босим остида ўтувчи 9 баҳслик кураш бор. Бунда уларнинг йўлида элитани тарк этишни истамаётган рақиблар, чемпионлик учун асосий даъвогар "Навбаҳор" ва бошқалар бор.

Бешинчидан, халқаро турнир чемпионлиги яхшигина маблағ тақдим этади. Солиштириш учун Ўзбекистон Суперлигаси ва Кубоги ғолибига ташкилотчилар томонидан пул маблағи берилмайди, ОФК эса, кубокда чемпион бўлган жамоа ҳисоб рақамига 1,5 миллион АҚШ доллари ўтказиб беради. Бу ўзбек сўмида ҳисобланса, 16 миллиард сўмдан кўпроқ пул дегани. Боз устига, мухлислар қулоғига ҳам халқаро турнирда ғолиб бўлиш яхшироқ эшитилади. Гарчи Бақоев матбуот анжуманида биз ҳар учала фронтда бирдек курашни давом эттирамиз деган бўлса-да, ақлли бўри тўдаси керакли пайтда бор эътиборини бир жойга йиға олиши лозим. Акс ҳолда, ҳамма оч қолиб, тўда тарқалиб кетиши ҳеч гап эмас.

Ана энди ўйлаб кўринг, "Сўғдиёна" учун қайси йўл манфаатлироқ? Фикрингизни изоҳларда қолдиринг!

Жавоҳир Азимов