“Барса” футболчисига машҳур клубдан иш чиқди

Испаниянинг амалдаги чемпиони “Барселона” тарбияланувчиси Хофре Торрентс фаолиятини “Аякс”да давом эттириши мумкин. Бу ҳақда De Telegraaf хабар берди.

Манбага кўраа, Нидерландиянинг машҳур клуби 19 ёшли футболчини эркин агент сифатида ўз сафига қўшиш устида ишламоқда.

Футболчининг ўзи билан 2030 йилга қадар шартнома тузиш масаласи муҳокама қилинмоқда. Шу билан бирга, “Барселона” ёш испаниялик футболчини кейинчалик қайта сотиб олиш ҳуқуқига эга бўлиши қайд этилган.

“Барселона” асосий жамоаси таркибида Торрентс 4 та учрашувда иштирок этган ва голли ҳаракатларни амалга оширмаган.

Аввалроқ каталонияликлар бош мураббийи Ханс-Дитер Флик Торрентс ва яна бир қатор футболчиларни асосий жамоа машғулотларидан четлатгани маълум бўлганди, чунки у ушбу футболчиларга ишонч билдирмаяпти.