"Барса" Левандовскига ўринбосар сифатида А Сериянинг тўпурарини жалб қилмоқчи

Каталониянинг машҳур клуби "Барселона" тажрибали ҳужумчи Роберт Левандовскига муносиб ворис излашни бошлади. "Tuttosport" нашрининг хабар беришича, 36 ёшли футболчининг ўрнини тўлдирадиган асосий номзод сифатида ҳозирда "Фиорентина" сафида тўп сураётган Мойзе Кин кўрилмоқда.

Маълумотларга кўра, сўнгги вақтларда "блауграна" Киннинг ўйинларини диққат билан кузатмоқда ва уни ўз таркибига қўшишга жиддий эътибор қаратган.

Айни пайтда, италиялик ҳужумчи А Серияда 17 та гол киритиб, бу кўрсаткич бўйича фақатгина "Аталанта" форварди Матео Ретегидан (23 гол) орқада қолмоқда.

Эслатиб ўтамиз, Мойзе Кин аввалроқ "Ювентус" сафида ҳаракат қилган.