"Барса"нинг янги юлдузи иккита гол урди, жамоа ғалабани қўлдан чиқарди

«Бирмингем Сити» ва «Барселона» ўртасидаги ўртоқлик учрашуви дуранг билан якунланди. «Сент-Эндрюс» стадионида (Бирмингем, Англия) бўлиб ўтган беллашув 2:2 ҳисобида тугади.

Ҳисобни 31-дақиқада «Бирмингем Сити» футболчиси Аугуст Приске очди ва мезбонлар олдинга чиқиб олди. 

42-дақиқада «Барселона» аъзоси Ҳамза Абдулкарим пенальтини аниқ амалга ошириб, ҳисобни тенглаштирди. У 60-дақиқада яна бир бор рақиб дарвозасини ишғол этиб, дублга эришди. 

68-дақиқада «Бирмингем Сити» футболчиси Жон Солис жавоб голини урди ва таблода яна тенглик ўрнатди.

Ўтган мавсум якунларига кўра, «Бирмингем Сити» Чемпионшип мусобақасида 64 очко тўплаб, турнир жадвалида 10-ўринни эгаллаган. «Барселона» эса Ла Лигада 94 очко жамғариб, жадвалда биринчи поғонада якунлади ва Испания чемпионига айланди.