"Барса" ўз футболчисига жуда катта нарх қўйди

«Барселона» ҳимоячи Жюль Кунде учун 80 миллион евро миқдорида трансфер нархини белгилади. Бу ҳақда ElNacional.cat нашри хабар берди.

Маълумотларга кўра, «Челси» Кунде трансфери вариантларини жиддий кўриб чиқмоқда. Лондон клуби бу қарорни Мало Гюсто «Манчестер Сити»га ўтиши якунлангандан сўнг қабул қилиши мумкин. 

Шу билан бирга, «Барселона» ушбу ёзда Кунде учун белгиланган суммадан камроқ таклифларни муҳокама қилиш ниятида эмас.

Франция терма жамоаси аъзоси бўлган Кунденинг каталонияликлар билан амалдаги шартномаси 2030 йил ёзигача мўлжалланган. Transfermarkt портали ҳимоячини 60 миллион евро атрофида баҳоламоқда. 

Ўтган мавсумда у Ла Лигада 30 ўйин ўтказиб, 1 та гол урди ва 3 та голли узатма амалга оширди. Жюль Кунде 2022 йилдан бери «Барселона» шарафини ҳимоя қилиб келмоқда, унгача эса «Севилья» таркибида тўп сурган.