“Барса” ўйинчи сўраб, “Ливерпуль”га таклиф юборди

“Барселона” раҳбарияти оғир жароҳат олиб, тахминан бир йилга сафдан чиққан Марк Берналь ўрнини тўлдиришга қарор қилди.

Таниқли инсайдер Фабрицио Романонинг маълум қилишича, каталонияликлар ёзги трансфер ойнаси ёпилгунича ярим ҳимояда ўйнайдиган футболчини олиб келмоқчи.

Манбага кўра, “Барселона” мутасаддиларига “Ливерпуль” вакили Стефан Байчетичнинг номзоди маъқул келган. Каталонияликлар 19 ёшли ўйинчини трансфер қилиш ҳуқуқисиз бир мавсумга ижарага олиш учун ливерпулликларга 4 миллион евро таклиф қилган.

Келиб чиқиши сербиялик бўлган Байчетич Испания фуқароси ҳам ҳисобланади. Футболдаги дастлабки қадамини “Сельта”да ташлаган. Кейин “Ливерпуль” академиясига кўчиб ўтган.

Стефан майдан маркази ва ҳимоя чизиғидан ўйнай оладиган универсал футболчилардан ҳисобланади. “Ливерпуль” ҳали каталонияликлар таклифига жавоб қайтаргани йўқ.