Каннаваро Ўзбекистоннинг Аргентина билан ўйини бекор бўлиши сабабини очиқлади

Ўзбекистон миллий терма жамоаси бош мураббийи Фабио Каннаваро сентябрь-октябрь ойларидаги ФИФА кунлари доирасида ўтказилиши керак бўлган Аргентина — Ўзбекистон учрашуви нега бекор қилинганини маълум қилди.

"Аргентина билан ўйнаш учун ҳаракат қилган эдик. Бироқ сўнгги ҳафталарда Аргентина футбол федерацияси Лионель Мессининг хайрлашув учрашувини ташкил этиш бўйича қарор қабул қилди. Шу сабабли бошқа рақиб излашимизга тўғри келди ва Сурия билан келишувга эришилди. Сурия яхши жамоа, унга қарши ўйинлар доимо қийин кечади. Албатта, бу Аргентина эмас, аммо рақибга ҳурмат билан қараймиз ва яхши футбол намойиш этишга интиламиз", — деди мутахассис.

Маълумот учун, "оқ бўрилар" эртага Эрон билан баҳс олиб боради. Ўйин Тошкент вақти билан соат 19:00 да старт олади.