“Барса” Рэшфорд учун ўз ўйинчисини Манчестерга юборади

“Барселона” раҳбарияти жамоа ҳужум чизиғини кучайтириш мақсадида “Манчестер Юнайтед” билан ўйинчи алмаштиришни мўлжаллаяпти.

TEAMtalk нашрининг маълум қилишича, Роберт Левандовски ўрнини боса оладиган ҳужумчи қидираётган испан гранди “Манчестер Юнайтед”га керак бўлмай қолган Маркус Рэшфордга жиддий қизиқиб қолган.

Каталонияликлар 27 ёшли англиялик тўпурарни олиш учун Манчестерга Ансу Фатини жўнатишга тайёр.

Ансу Фати уч йил муқаддам катта футбол саҳнасида порлай бошлаган даврда “Манчестер Юнайтед” бу ҳужумкор футболчи учун “Барселона”га 200 миллион евро ҳам таклиф қилганди. Бироқ ўшанда каталонияликлар Ансу Мессининг вориси эканини таъкидлаб, бу трансферга кўнмаган.

Бугунги кунда Ансу Фати “Барселона”нинг асосий таркибига кира олмаяпти ва клуб ундан тезроқ қутилмоқчи. Ҳали манчестерликлар “Барса”нинг таклифига муносабат билдиргани йўқ.