“Барса” юлдузлари Фликка норозилик билдирди

Испаниянинг амалдаги чемпиони “Барселона” Осиё бўйлаб уюштирилган турнени якунлаб, яна ўз қароргоҳига қайтди. Бироқ бу сафарнинг якуни футболчилар истагандек бўлмади.

AS нашрининг маълум қилишича, жамоанинг бир неча етакчи футболчилари бош мураббий Ханс-Дитер Фликка мурожаат қилиб, уларга клуб мутасаддиларининг логистика йўналишида амалга оширган ишлари ёқмаганини очиқ айтди.

Манбага кўра, ўйинчиларга Жанубий Кореянинг “Тэгу” жамоасига қарши ўтказилган учрашувдан кейин Сеул аэропортигача тўрт соат автобусда юрилгани ёқмаган. Қолаверса, чартер рейс тонгги соат тўртга қўйилгани ҳам уларнинг норозилигига сабаб бўлди.

Жамоа Испанияга қадар 13 соат парвоз қилган ва толиқиб қолган.

Ханс-Дитер Флик вазиятдан чиқиш учун бутун жамоага бир кунлик қўшимча таътил беришга мажбур бўлди.