“Барса”нинг икки юлдузи клубдан кетишдан бош тортди

“Барселона” раҳбарияти нги бош мураббий Ханс-Дитер Флик қўллайдиган ўйинига мос янги ижрочиларни олиб келиш учун ҳозирги таркибдаги юлдузларнинг айримлари билан хайрлашишга мажбур бўлмоқда.

Бу йўл орқали каталонияликлар ҳам трансфердан пул ишлаб олади, ҳам маош фондини қисқартиради.

AS нашрининг маълум қилишича, трансферга қўйиладиган ўйинчилар рўйхатига ярим ҳимоячи Френки де Йонг ва ҳужумкор футболчи Рафинья ҳам киритилган. Манбага кўра, бу футболчилар “Барселона”дан кетишдан бош тортяпти ва ўзларига берилаётган таклифларни рад этмоқда.

Нидерландиялик футболчи нафақат “Барселона”да, балки Испания чемпионатида энг катта маош оладиган ўйинчи ҳисобланади. Каталонияликлар унга ҳар мавсум учун 37,5 миллион евро тўлаб келади. 2026 йилнинг ярмигача ана шундай катта маблағ оладиган ўйинчи клубдан кетишни истамаётганини тўғри тушуниш мумкин.

Бразилиялик Рафиньянинг ҳам Каталониядаги топиш-тутишлари ёмон эмас. Унинг ҳамкорлиги 2027 йилнинг ёзигача расмийлаштирилган.