“Барса”нинг қамалган юлдузи ўзига клуб сотиб олиб, яна футбол ўйнайди

“Барселона” клуби ва Бразилия терма жамоасининг собиқ ҳимоячиси Дани Алвес Португалиянинг “Сан-Жуан-де-Вер” футбол клуби эгасига айланишни ва футболчилик фаолиятини қайта тиклашни режалаштирмоқда.

Бу ҳақда ESPN нашри хабар берди.

Нашр маълумотларига кўра, Алвес Португалиянинг учинчи дивизионида иштирок этувчи “Сан-Жуан-де-Вер” клубини сотиб олишнинг сўнгги деталларини келишиб бўлди.

Бундан ташқари, 42 ёшли футболчи ўзи харид қиладиган клуб билан ярим йиллик шартнома имзолашни ва майдонга қайтиб, футбол ўйнашни мўлжаллаб қўйган.

Алвес уч йиллик танаффусдан кейин спорт формасини тиклаб олиш учун бир ой машғулот олиб бориши етарли, деб ҳисобламоқда.

Бразилиялик юлдуз ўз даврида Испаниянинг “Барселона” ва “Севилья”, Франциянинг “Пари Сен-Жермен”, Италиянинг “Ювентус”, Бразилиянинг “Баия” ва “Сан-Паулу” каби жамоаларида тўп сурган. Ҳимоячи сўнгги бор 2023 йилнинг 8 январида Мексика чемпионати биринчи тури доирасида “Пумас” жамоаси сафида “Хуарес”га қарши ўйинда майдонга тушган эди.

Дани Алвес футбол тарихида энг кўп соврин ютган ўйинчилардан бири бўлиб, унинг ҳисобида 43 та чемпионлик соврини бор. Дани олти карра Испания чемпиони, икки карра Франция чемпиони, Италия чемпиони бўлган, уч марта Чемпионлар Лигасида, икки марта УЕФА Кубогида, уч марта УЕФА Суперкубогида зафар қучган.

Бразилия терма жамоаси таркибида у икки мартадан Конфедерациялар кубогини (2009, 2013) ва Америка кубогини (2007, 2019) қўлга киритган, шунингдек, Олимпия чемпиони ҳам  бўлган.

2024 йил февралида Алвес жинсий зўравонлик иши бўйича 4,5 йиллик қамоқ жазосига ҳукм қилинган эди. 2025 йилнинг мартида Каталония Олий суди (TSJC) собиқ футболчини оқлаш ҳақида қарор чиқарди.