"Барселона" афсонаси Ямални қаттиқ огоҳлантирди

Собиқ франсиялик ҳужумчи Тьерри Анри "Барселона"нинг ёш иқтидорли футболчиси Ламин Ямалнинг ортиб бораётган шуҳрати борасида огоҳлантирди. У Ямалнинг ҳолатини Божан Кркичнинг тарихига қиёслади. Божан ҳам бир вақтлар "Барселона" учун улкан истеъдод сифатида кўрилган, бироқ ёшликдаги катта умидларни оқлай олмаган эди.

"Ла Масиа" академиясида Божан барча ёш тоифаларида 423 та гол уриб, клуб тарихидаги энг яхши тўпурар бўлганди. У 2007 йилда Френк Райкаард қўл остида 17 ёшида асосий жамоада дебют қилган. Бироқ унга бўлган босим унинг ривожланишига салбий таъсир кўрсатган ва кутилган даражадаги карера қила олмаган.

Анри, Божан билан бирга тўп сурган собиқ жамоадоши сифатида, ҳозирги вақтда Ямал дуч келаётган босим борасида ташвиш билдирди:

"Мен бундай ҳолатни илгари ҳам кўрганман. Бу мен билан содир бўлмаган, лекин Божан Кркич билан содир бўлганига гувоҳ бўлдим. Унинг ҳикоясини ўрганинг, ҳужжатли филмни томоша қилинг ва ёш футболчига бирданига катта шуҳрат ва босим юкланганда нима содир бўлиши мумкинлигини тушунинг," – деди 1998 йилги Жаҳон чемпиони "CBS Sports" телеканалидаги шарҳларида.