"Barselona" afsonasi Yamalni qattiq ogohlantirdi

Sobiq fransiyalik hujumchi Terri Anri "Barselona"ning yosh iqtidorli futbolchisi Lamin Yamalning ortib borayotgan shuhrati borasida ogohlantirdi. U Yamalning holatini Bojan Krkichning tarixiga qiyosladi. Bojan ham bir vaqtlar "Barselona" uchun ulkan iste’dod sifatida ko‘rilgan, biroq yoshlikdagi katta umidlarni oqlay olmagan edi.

"La Masia" akademiyasida Bojan barcha yosh toifalarida 423 ta gol urib, klub tarixidagi eng yaxshi to‘purar bo‘lgandi. U 2007 yilda Frenk Raykaard qo‘l ostida 17 yoshida asosiy jamoada debyut qilgan. Biroq unga bo‘lgan bosim uning rivojlanishiga salbiy ta’sir ko‘rsatgan va kutilgan darajadagi karera qila olmagan.

Anri, Bojan bilan birga to‘p surgan sobiq jamoadoshi sifatida, hozirgi vaqtda Yamal duch kelayotgan bosim borasida tashvish bildirdi:

"Men bunday holatni ilgari ham ko‘rganman. Bu men bilan sodir bo‘lmagan, lekin Bojan Krkich bilan sodir bo‘lganiga guvoh bo‘ldim. Uning hikoyasini o‘rganing, hujjatli filmni tomosha qiling va yosh futbolchiga birdaniga katta shuhrat va bosim yuklanganda nima sodir bo‘lishi mumkinligini tushuning," – dedi 1998 yilgi Jahon chempioni "CBS Sports" telekanalidagi sharhlarida.