“Барселона” Флорентино Переснинг шов-шувли матбуот анжуманига муносабат билдирди

“Барселона” клуби расмий сайти орқали “Реал Мадрид” президенти Флорентино Переснинг сўнгги баёнотларига муносабат билдирди.

Матбуот анжумани давомида Перес “Барселона” ва ҳакамлар техник қўмитасининг собиқ вице-президенти Хосе Мария Негрейра ўртасидаги ҳамкорликда коррупцион ҳолатлар бўлганини таъкидлаган эди. Шунингдек, у ушбу иш бўйича тегишли ҳужжатлар УЕФАга топширилишини маълум қилди.

“Флорентино Перес чақирган матбуот анжумани муносабати билан шуни маълум қиламизки, клубимизнинг юридик бўлими унинг баёнотлари ва айбловларини диққат билан ўрганмоқда. Ҳозирда улар таҳлил қилинмоқда ва кейинги қадамлар баҳоланяпти. Ўз позициямизни ва қабул қилиниши мумкин бўлган қарорлар ҳақида тегишли вақтда қўшимча маълумот берамиз”, — дейилади каталонияликлар баёнотида.