"Барселона" футболчиси: Ҳеч қаерга кетмайман!

Ферран Торрес "Барселона"да қолиб, кўпроқ ўйин амалиётига эришмоқчи. Diario Sport нашри хабарига кўра, клуб ёзда у билан хайрлашишга тайёр бўлишига қарамай, 23 ёшли испаниялик ярим ҳимоячи эртами кечми мунтазам ўйин амалиёти билан таъминланишига ишонган ҳолда "кўк-аноррангилар" сафида ўйнашни давом эттирмоқчи. Ферран узоқ йиллар “Камп Ноу”да қолиб, жамоанинг асосий футболчисига айланишига ишонмоқда.

Таъкидланишича, "Барселона" ҳали Торрес борасида бирор бир қарорга келмаган, бироқ раҳбарият унинг трансферидан катта зарар кўрмаслик учун уни сотмаслиги ҳам мумкин. Эслатиб ўтамиз, “Барса” Ферранни 2021 йилнинг декабрида “Манчестер Сити”дан 55 миллион еврога сотиб олган эди.

Ўтган қишки трансфер ойнасида "Атлетико" ва бир қатор Италия клублари Торресни ижарага олиш таклифи билан чиқишди, аммо каталонияликлар бу таклифларни ҳатто кўриб чиқишни ҳам исташмади.

Ярим ҳимоячи жорий мавсум Ла Лигада 23 та ўйинда майдонга тушиб, 2 та гол урди.