"Барселона" футболчисининг келажаги номаълум. Ўйинчи АПЛга йўл олиши мумкин

Даниялик ҳимоячи Андреас Кристенсеннинг "Барселона"даги келажаги масаласида ҳозирча аниқ қарор йўқ. Футболчининг каталонияликлар билан амалдаги шартномаси мавсум охиригача мўлжалланган.

Қоидаларга кўра, икки ҳафтадан сўнг Кристенсен хорижий клублар билан эркин музокара олиб бориши ва ҳатто дастлабки шартнома имзолаши мумкин бўлади — бунга ФИФА регламенти рухсат беради.

"AS" нашрининг хабарига кўра, "Барселона" Кристенсеннинг профессионаллигини юқори баҳолайди, аммо ҳозирча унга янги шартнома таклиф қилишга шошилмаяпти. Каталония клубининг бу пассив позицияси бошқа жамоалар учун имконият яратмоқда.

Хусусан, Кристенсен Англияга қайтиши мумкин — 29 ёшли ҳимоячини "Ньюкасл" анчадан бери кузатиб келмоқда. Шунингдек, манба таъкидлашича, Саудия Арабистонининг молиявий имконияти юқори бўлган клублари ҳам уни ўз сафига қўшиб олишга уриниши мумкин.