Messi Argentina — O‘zbekiston o‘yinini bekor qiladigan bo‘lyapti

Argentina va O‘zbekiston terma jamoalari oʻrtasida rejalashtirilgan oʻrtoqlik uchrashuvi Lionel Messi ishtirokiga bogʻliq holda savol ostida qoldi, deb xabar bermoqda World Soccer Talk manbasiga tayanib.

ESPN Argentina nashri insaydari Esteban Edul maʼlumoticha, Xitoydagi tashkilotchilar Argentina futbol assotsiatsiyasiga Osiyoda bir nechta oʻrtoqlik oʻyinlari oʻtkazish taklifini bergan. 

Dastlab muzokaralar toʻxtab qolgan, chunki qabul qiluvchi tomon shartnoma doirasida Messining maydonga tushishini kafolatlashni talab qilgan. AFA esa bunday majburiyatni oʻz zimmasiga olishga tayyor emasligini bildirgan.

Hozir muzokaralar yana jonlandi, ammo 39 yoshli hujumchi ishtirok etamidimi-yoʻqmi, degan savol hali ham asosiy muammo boʻlib turibdi. Tur doirasidagi moliyaviy kelishuvlar aynan Messining maydonga tushishiga bevosita bogʻliq ekani taʼkidlanmoqda.

Argentina uchun ehtimoliy raqiblardan biri sifatida O‘zbekiston terma jamoasi tilga olinmoqda. O‘zbekiston ommaviy axborot vositalarida tarqalgan xabarlarga koʻra, milliy jamoalar 30 sentabr kuni Xitoyda oʻzaro bahs olib borishi kutilmoqda. Shu bilan birga, Argentina futbol assotsiatsiyasi haligacha ushbu oʻyinni rasmiy tasdiqlagani yoʻq.

Argentina terma jamoasining jahon chempionati finalida Ispaniyaga magʻlub boʻlganiidan soʻng, Lionel Messi milliy jamoadagi kelajagi haqida ommaviy bayonot bermagan. 

Federatsiya rahbariyati undan kamida 2028 yildagi Amerika kubogigacha terma jamoa sharafini himoya qilishni kutayotgani aytilmoqda. Biroq yakuniy qaror baribir futbolchining oʻzigа bogʻliq boʻlib qolmoqda.

Eslatib oʻtamiz, har ikki terma jamoa 2026 yildagi jahon chempionati ishtirokchisi hisoblangadi. Lionel Messi yetakchiligidagi argentinaliklar finalgacha yetib bordi va musobaqani ikkinchi oʻrinda yakunladi. 

Oʻz tarixida ilk bor jahon chempionatida ishtirok etgan O‘zbekiston milliy terma jamoasi esa guruh bahslarida Portugaliya, Kolumbiya va Kongo Demokratik Respublikasi futbolchilariga yutqazib qoʻydi va turnirni erta tugatdi.