"Барселона" Ла Лиганинг 4-турини 6 минг кишилик стадионда ўтказмоқчи

"Барселона" 6 минг кишилик стадионда "Валенсия" билан ўйнаши мумкин.

Каталонияликлар 2025/26 йилги мавсум учун уй стадиони танлаш устида ишлашда давом этмоқда. Клуб қайта қурилаётган "Камп Ноу"дан фойдаланиш учун зарур бўлган ва томошабинлар хавфсизлигини кафолатлайдиган лицензияларни олишни кутмоқда. Бу борада амалга оширилган ишларга қарамасдан, стадионни фойдаланишга топшириш учун шаҳар кенгашидан дастлабки рухсатнома олинмаган.

Ҳозирда "Барса"нинг тақвимида Ла Лиганинг 4-туридан ўрин олган "Валенсия"га қарши илк уй учрашуви 13 ёки 14 сентябр кунлари бўлиб ўтиши кутилмоқда. Қурилиш ишларининг боришини ҳисобга олган ҳолда, клуб аллақачон "Камп Ноу"дан фойдаланишни истисно қилган.

Айни пайтда 6 минг томошабинга мўлжалланган "Эстади Йохан Кройфф" стадиони ўйин ўтказилиши мумкин бўлган энг эҳтимолий жой бўлиб турибди, деб ёзади Marca.

"Месталя"дан фойдаланишнинг иложи йўқ, чунки Ла Лига "Барселона"га дастлабки тўрт турни сафарда ўтказишни рад этди.

Клуб ўтган мавсумда ўйинлар ўтказилган "Олимпик Люис Компанис"ни ҳам кўриб чиққан эди, аммо 12 сентябрь куни аренада концерт бўлиб ўтади, шунинг учун майдонни ўйинга тайёрлаш муаммо бўлади. "Жирона"нинг уй стадиони - "Монтиливи" варианти ҳам кўк-аноррангга унчалик мос келмайди.

Шунинг учун ҳозирда Кройфф номидаги ўйингоҳ асосий вариант ҳисобланади. Бироқ, ўйинни ўтказиш учун Ла Лиганинг махсус рухсати керак, чунки регламентга кўра чемпионат жамоаси стадионининг минимал сиғими 15 000 ўринни ташкил қилади.

"Барса" Ла Лигани бундай қарорга келишга ишонтирмоқчи, чунки гап мавсумдаги барча ўйинлар эмас, балки фақат битта ўйин ҳақида кетмоқда.

Бундан ташқари, шу пайшанба куни "Барселона" Европа Чемпионлар Лигасининг барча уй учрашувларини қаерда ўтказишини УEФАга маълум қилиши керак. Клубда "Камп Ноу"ни эълон қилишмоқчи, аммо "Олимпик Люис Компанис" варианти ҳам бўлиши мумкин.