Леклер Британия Гран-Присида ғалаба қозонди, чемпионат етакчиси Кими Антонелли очколар йўқотди

“Феррари” жамоаси пилоти Шарль Леклер Буюк Британия Гран-присида ғалаба қозонди. Жорж Расселл ва Льюис Хэмилтон ўзлари учун уй пойгаси бўлган босқични шоҳсупада якунлашди.

Стартда “Феррари”нинг ҳар икки пилоти поул позициясидан пойгани бошлаган Кими Антонеллини ортда қолдиришга муваффақ бўлди ва Леклер пешқадамликни қўлга олди. Макс Верстаппен эса Исак Хаджар ҳамда Ландо Норрисни қувиб ўтиб, биринчи айланани бешинчи ўринда якунлади. Оскар Пиастри эса старт пайтида машинасига шикаст етказиб олди ва янги олд қанот ўрнатиш учун боксларга йўл олди.

Учинчи айланага келиб етакчи бешликдаги кураш бироз сусайди — барча пилотлар ўртасидаги фарқ бир сониядан ошиб кетди. Норрис эса Хаджарни таъқиб қилишда давом этди. Кўп ўтмай Хэмилтоннинг темпи пасая бошлади ва Антонелли унга яна яқинлашди. Шу билан бирга, етти карра жаҳон чемпиони старт чироқлари ўчишидан олдин ҳаракатни бошлагани учун беш сониялик жаримага тортилди. 11-айланада британиялик суперюлдуз Антонеллига ўз позициясини бой берди.

Тоза ҳавода ҳаракат қилганига қарамай, Антонелли 4,5 сониялик фарқни тез қисқартира олмади ва деярли Леклер билан бир хил темпда ҳаракатланди. Расселлнинг ишлари ҳам унчалик яхши кетмади — 17-айланада у Верстаппенга ўрнини бўшатиб берди. Бироқ айлана охирида нидерландиялик 4 карра чемпион пит-стоп учун боксларга киргани сабабли “Мерседес” пилоти яна тўртинчи ўринга қайтди, Верстаппен эса олтинчи бўлиб, Норрис ортида пойгага қайтди.

24-айланада Хэмилтон боксларга кириб, беш сониялик жаримасини ўтади ва қаттиқ шиналарда (Hard) олтинчи бўлиб қайтди. Кейинги айланада “Феррари” Леклер пит-стопга чақирди ва монаколик фақат Антонеллини олдинга ўтказди.

30-айланада Хэмилтон Хаджарни ортда қолдириб, Расселлга ҳужум қилди, аммо “Мерседес” пилоти тўртинчи ўрнини сақлаб қолди. Бир давра ўтиб эса икки британиялик ўртасидаги кураш яна авж олди ва улар бир неча бор ўрин алмашишди. Кейинчалик Расселл Верстаппенга етиб олди ва уч томонлама жанг юзага келди. Шу пайтда “Мерседес” жамоаси британиялик пилотга орқа шинаси тешилганини ва секин ҳаво чиқаётгани ҳақида хабар берди. Дастлаб у боксларга киришни рад этди, бироқ жамоа уни кўндирганидан сўнг пит-стоп амалга оширди ва натижада Хэмилтон, Норрис ҳамда Хаджарни олдинга ўтказиб юборди.

Антонелли 36-айланада шиналарини алмаштириб, Леклердан беш сония ортда иккинчи ўринда пойгага қайтди ва тезда фарқни қисқартира бошлади. Шу пайтда Хэмилтон Верстаппен билан курашни давом эттириб, уч айлана ўтиб уни ҳам ортда қолдирди.

39-айланада Хьюлкенбергнинг болиди тўхтаб қолгани туфайли трассада виртуал хавфсизлик машинаси (Virtual Safety Car) режими эълон қилинди. Леклер, Антонелли ва Хемилтон пит-лейнга киришга улгурмай қолишди, бироқ Верстаппендан бошланган гуруҳ пит-стопларини амалга оширди. Натижада маррага 12 давра қолганида Верстаппен янги Medium шиналарда олдиндаги рақиблардан 11 сониялик фарқни йўққа чиқаришга уриниши керак эди, Леклер билан Антонелли ўртасидаги масофа эса атиги тўрт сонияни ташкил қиларди.

Аммо 41-айланада Антонелли машинасида муаммо борлигини маълум қилди. Механиклар унга шиналар ва олд қанотни алмаштириб беришди, бироқ муаммолар давом этди. Натижада Кими яна боксларга қайтишга мажбур бўлди ва трассага ўнинчи бўлиб чиқди. Бундан ташқари, у трасса чегараларини бузганлиги учун беш сониялик жарима олди. Ўша пайтда унинг Франко Колапинтогача бўлган фарқи уч сонияни ташкил қиларди.

48-айланада Верстаппен ўтган Австрия Гран-присида юзага келган муаммо: орқа қанотнинг охиргача ёпилмагани туфайли — Хэмилтонни қувишга уринаётганида шағалли хавфсизлик зонасига чиқиб кетди.

Леклер пит-стопга чақирилди, унинг ортидан Льюис ҳам боксларга кирди. Ҳар икки пилот юмшоқ шиналарни (Soft) танлади. Монаколик пешқадамликни сақлаб қолди, бироқ Хэмилтон пит-стоп қилмаган Расселлни олдинга ўтказиб юборди. Аммо хавфсизлик машинаси трассани тарк этмади ва пойга айнан хавфсизлик машинаси ортида якунланди.

1. Шарль Леклер ("Феррари") — 52 айлана
2. Джордж Расселл ("Мерседес") +0.427.
3. Льюис Хэмилтон ("Феррари") +0.772.
4. Ландо Норрис ("Макларен") +1.149.
5. Исак Хаджар ("Ред Булл") +1.598.
6. Лиам Лоусон ("Рейсинг Буллз") +2.023.
7. Арвид Линдблад ("Рейсинг Буллз") +2.214.
8. Габриэл Бортолето ("Ауди") +2.413.
9. Франко Колапинто ("Альпин") +3.229.
10. Пьер Гасли ("Альпин") +3.445.
11. Оскар Пиастри ("Макларен") +4.014.
12. Карлос Сайнс ("Уильямс") +4.391.
13. Оливер Берман ("Хаас") +5.245.
14. Эстебан Окон ("Хаас") +5.512.
15. Серхио Перес ("Кадиллак") +7.403.
16. Кими Антонелли ("Мерседес") +8.005.
16. Валттери Боттас ("Кадиллак") +8.162.
17. Фернандо Алонсо ("Астон Мартин") +1 айлана.
18. Лэнс Стролл ("Астон Мартин") +1 айлана.
Макс Верстаппен ("Ред Булл") — DNF (48-айлана).
Алекс Албон ("Уильямс") — DNF (47-айлана).
Нико Хюлькенберг ("Ауди") — DNF (39-айлана).