"Барселона" тарбияланувчиси Гримальдо: "Реал Мадрид"да ўйнашни орзу қиламан"

"Барселона" тарбияланувчиси, ҳозирда "Байер" сафида тўп сураётган чап қанот ҳимоячиси Алехандро Гримальдо "Реал Мадрид" томонидан унга бўлган қизиқиш ҳақидаги миш-мишларга муносабат билдирди.

"Реал"га ўтиш билан боғлашлари мени хурсанд қилади. Бу — фахрланишга арзигулик ҳолат. Одамлар мени дунёнинг энг кучли жамоаларидан бирида ўйнай оладиган даражадаги футболчи сифатида кўраётганлари — бу менинг орзум. Мен айнан шундай имкониятлар учун меҳнат қилганман ва бу менинг амбицияларимдан биридир.

"Байер" жуда кучли жамоа, лекин менинг орзум — Испанияга қайтиш. Бу ғоя анчадан бери юрагимда. Мадриднинг "Реал"ида ўйнашни хоҳлайманми? Албатта, мен дунёнинг энг яхши жамоаларида ўйнашни истайман. Агар шундай имконият бўлса, ундан фойдаланишга ҳаракат қиламан, чунки бу — мен 12 ёшимда "Барселона"га ўтганимдан бери интилаётган мақсадим," — деди Гримальдо Mundo Deportivo нашрига берган интервюсида.

Гримальдо жорий мавсумда барча турнирларда 47 та ўйинда майдонга тушиб, 4 та гол ва 13 та голли узатмага муаллифлик қилган. Унинг "Байер" билан тузган амалдаги шартномаси 2027 йилнинг ёзигача мўлжалланган. Transfermarkt порталига кўра, футболчининг бозор қиймати 40 миллион еврони ташкил этади.