"Барселона" Хави номзодини рад этди

"Барселона" бош мураббийи Кике Сетьен ўз лавозимида ишлашни давом эттиради.

Аs нашрининг хабарига кўра, Сетьен "кўк-анорранглилар"ни кейинги мавсумда ҳам шуғуллантиради.

Каталония клуби жамоанинг собиқ сардори ва Қатарнинг "Ал Садд" клуби бош мураббийи Хави ҳамда Голландия терма жамоаси устози Рональд Куман номзодларини рад этган. 57 ёшли мутахассиснинг номзоди рад этилиши Европа чемпионати 2021 йилга қолдирилгани билан боғлиқ.

Сетьен ва "Барса" ўртасидаги келишув 2022 йилгача амал қилади, аммо шартнома шартларига кўра, 2021 йилнинг июнида жамоага янги президент сайланади ва ушбу президент битимни бекор қилиши мумкин бўлади.

Ҳозирги вазиятда эса, жамоа соврин ютмаган тақдирда ҳам Сетьен каталонияликлар устози бўлиб қолади. Албатта, клуб раҳбарияти унинг бошқаруви остида жамоа ўйин сифати яхшиланишини кутмоқда.