"Барселона"да яна ўша муаммо

"Барселона" янги футболчиларни рўйхатдан ўтказишда қийналмоқда.

AS нашрининг ёзишича, Crowe аудиторлик компанияси аренани реконструкция қилишдаги кечикишлар туфайли "Камп Ноу" VIP-уйларини сотишдан тушган даромадларни ҳисоботда ҳисобга олишга рухсат бермайди. Шу сабабли клуб бу мавсумлар оралиғида 1:1 қоидасига эриша олмайди.

Ҳозирча рўйхатдан ўтишни уч нафар футболчи кутмоқда: Жерар Мартин, Войчех Шченсни ва Руни Барджи. Клубда таъкидланишича, Мартиннинг аризаси Ориел Ромеу шартномани бекор қилганидан кейин, Шченснининг рўйхатдан ўтиши эса Иняки Пенья шартномани узайтириб, тўловларни қайта тақсимлаб, ижарага кетганидан кейин амалга ошади.

Барджи билан боғлиқ вазият мураккаброқ кўринади. Талабнома фақат қўшимча даромад олиш, футболчини сотиш ёки клуб раҳбарияти томонидан шахсий кафолатлар бериш орқали амалга оширилиши мумкин.

Барджи "Барселона"га ёзда "Копенгаген"дан ўтганди. Қайд этилишича, вингерни рўйхатдан ўтказишда муваффақиятсизликка учраган тақдирда, қишки трансфер ойнасигача бўлса ҳам, фақат "Копенгаген"га ижарага бериш вариант бўлиб қолади.