Бартомеу Сетьеннинг келажаги, Хавининг жамоа бошқарувига келиши ва Месси билан муносабатлари ҳақида фикрларини билдирди

"Барселона" президенти Жозеп Бартомеу жамоа бош мураббийи Кике Сетьенга ишонишини, ҳужумчи Лионель Месси билан муносабатлари ва Хавининг жамоа бошқарувига келиши ҳақида берилган саволларга жавоб берди.

– Хави янги мавсумда жамоа бошқарувига келадими?

– Хави билан муносабатларимиз жуда яхши. У билан кўп мавзуларда суҳбатлашиб турамиз. Аммо Сетьен билан шартномамиз бор, унга ва унинг жамоасига ишонаман. У "Барселона"нинг ўйин модели ва услубини жуда яхши билади.

Сетьен психологик томондан катта тажрибага эга мутахассис, ўзини танқид қила олиши эса фикрларимни тасдиқлайди. У чемпионлар лигасида ғолиб бўла олиши мумкин, шундан сўнг у янги мавсумга тайёргарликни бошлаб юборади.

– Сетьен ва Месси бир соатдан кўпроқ суҳбатлашди. Улар ўртасидаги муаммолар шунчалик кўпми?

– Буни уларнинг ўзидан сўранг. Улар учрашгани рост, бироқ учрашув якуни ҳақида на Сетьен, на Месси мени хабардор қилди.

– Лекин шунча узоқ гаплашгани яхшими ёки ёмон?

– Бу ажойиб. Мураббийлар футболчилари билан мулоқот қилиши, фикр алмашиши, мулоҳаза юритиши керак. Бу жамоа бирлашуви учун керак. Яна Месси жамоа сардори ва у бутун жамоа фикрларини ифодалайди, - дейди "Барселона" президенти.