"Бавария" 80 миллион евролик ёш юлдуз учун курашга қўшилди

Мюнхеннинг "Бавария" клуби Энтони Гордон бўйича музокаралар муваффақиятсиз якунланганидан сўнг диққатини "Борнмут"нинг 19 ёшли ҳужумчиси Эли Жуниор Крупига қаратди. Бу ҳақда Goal портали хабар берди.

Немис клуби ёш француз футболчисини яқиндан кузатиб бормоқда. Уни жаҳон футболи афсонаси Тьерри Анри ҳам юқори баҳолаган.

Анри аввалроқ Франция ёшлар терма жамоасида ишлаган даврида 16 ёшли Крупини термага чақириш ҳақида ўйлаганини айтган эди. У бу ҳақда шундай деган: "Агар мен истеъдод ва қатъиятни кўрсам, ёш аҳамиятга эга эмас".

Манбаларга кўра, футболчининг трансфери тахминан 80 миллион евро атрофида баҳоланмоқда.

Крупи майдонда бир нечта позицияларда ўйнай олади ва у Англия Премьер-лигасида ўзини кўрсатишга улгурган. У ўтган мавсумда 33 ўйинда 13 та гол урган.

Аввалроқ у Франциянинг "Лорьян" жамоасига юқори дивизионга қайтишда ёрдам бериб, 22 та гол билан ажралиб турган.

"Бавария" ҳужум чизиғини кучайтириш ва Xарри Кейнга рақобат яратиш учун универсал футболчи изламоқда. Шунингдек, у Луис Диасга ҳам муқобил вариант сифатида кўрилмоқда.

Крупи учун курашга "Манчестер Сити", "Арсенал" ва "Барселона" ҳам қўшилган.