"Бавария"да ўйнаган тўрт футболчи ўзига жамоа сотиб олди

Мюнхеннинг машҳур "Бавария" клуби собиқ юлдузлари Томас Мюллер, Янн Зоммер, Матс Хуммельс ва Лукас Эрнандес Португалиянинг "Эштрела Амадора" жамоаси акцияларини сотиб олди. Бу ҳақда The Sun нашри хабар берди.

Маълумотларга кўра, футболчилар киритилган инвестиция консорциуми клуб акцияларининг 90 фоизини тахминан 40 миллион евро эвазига қўлга киритган.

Шу билан бирга, Мюллер, Зоммер, Хуммельс ва Эрнандес клуб бошқарувига бевосита аралашишни режалаштираётгани йўқ. Консорциумга раҳбар этиб Йоханнес Мосманг тайинланган. У тақрибан ўн йил давомида "Бавария"да ушбу футболчилар билан бирга ишлаган.

"Эштрела Амадора"нинг аввалги эгаси Паулу Лопу клубни 2020 йилда бор-йўғи 71 минг еврога сотиб олган эди. 2023 йилдан буён жамоа Португалия чемпионатининг олий дивизионида иштирок этмоқда.