"Бавария" Ҳарри Кейн ўрнига ҳеч ким кутмаган ҳужумчини танлади

«Манчестер Юнайтед» ҳужумчиси Беньямин Шешко келгусида «Бавария»да Ҳарри Кейннинг ўрнини босиши мумкинлиги айтилмоқда.

Мюнхен клуби 23 ёшли словениялик форвардни инглиз тўпурари учун узоқ муддатли ўринбосар сифатида кўриб чиқмоқда. Бу ҳақда Transfer News Live нашри журналист Кристиан Фалькка таяниб хабар берди. Маълумотларга кўра, «Бавария» Шешкого 2024 йилнинг ўзидаёқ қизиқиш билдирган ва шундан бери футболчи Германиянинг энг совриндор жамоаси скаутлари диққат марказида қолмоқда.

«Манчестер Юнайтед» Беньямин Шешкони ўтган йил ёзги трансфер ойнасидан олдин «РБ Лейпциг»дан 76,5 миллион евро эвазига сотиб олган эди. Унинг Англиядаги илк мавсумида словениялик ҳужумчи 32 ўйинда майдонга тушиб, 12 та гол урди ва бир марта голли узатма берди. Шу тариқа у манчестерликлар сафида дебют мавсумини муносиб кўрсаткичлар билан якунлади.