“Бавария” бош мураббийи Ханс-Дитер Флик яқинда мюнхенликлар билан шартномасини 2023 йилга қадар узайтирганди.

Бунгача катта клубларда бош мураббий бўлиб ишламаган, асосан ёрдамчи лавозимида фаолият кўрсатган мутахассис учун бу янги чақириқ эди.

У клуб журнали «51»га берган интервьюсида олдин қандай иш билан шуғуллангани, мураббийликка жиддий киришганидан кейин қайси клубларнинг иш фаолиятларини ўргангани ҳақида гапириб ўтди.

- Эҳтимол менинг меҳнат йўлим бироз ноодатийроқдир. Мен 20 йилдан буён спорт магазинини бошқариб келаман, қачонлардир ўзим ҳам сотувчилик қилганман. Мен шу тариқа келажагимни таъминлашни хоҳлаганман, аммо мураббий бўлмоқчи эканлигимни доимо билганман. Мен ҳар бир поғонани босиб ўтишни истаганман ва клубларда ниманидир ўрганганман. Ҳозир булар ишимда ёрдам бермоқда.

Германия футбол иттифоқида дастлаб мураббий, кейин эса спорт директори сифатида ишлаган даврларимдан бери кўплаб академияларга ташриф буюрдим. Бошқалар қаторида шунингдек, «Реал» ва «Барселона» академияларида ҳам бўлдим.

Уч кун давомида «Манчестер Сити» ва ПСЖ машғулотларини кузатдим. Шу қаторда «Бавария»га ҳам келганман. Кетма-кет уч йил «Арсенал»нинг Австриядаги машғулот йиғинига борганман. Ўшанда мен ўзимга-ўзим шундай дегандим: «Буларнинг ҳаммасига эътибор билан қара! Бу мураббий ўз ишини янада яхшироқ қилиш мумкинлиги ҳақида жуда кўп ўйлайди. Булардан ўз мақсадларинг йўлида қандай фойдаланишинг мумкин?»

Мен бошқаларнинг ишлаб чиққанларидан нусха кўчиришга ҳеч қачон уринмаганман. Мен бу янги ғоялардан ўзимга туртки бериш учун фойдаланганман.

Матнда хатолик топсангиз, ўша хатони белгилаб, бизга жўнатинг (Ctrl + Enter)