Бахтиёр Ашурматов: "Бугун жамоамни танимадим"

Cоcа-Cола Суперлига 1-туридан ўрин олган "Турон" – "Бухоро" (1:2) учрашувидан сўнг мезбонлар бош мураббийи Бахтиёр Ашурматов мағлубиятга изоҳ берди.

"Тўғриси, шунча кўрган тайёргарлигимиз, раҳбарлар ва мухлисларнинг қўллаб-қувватлаши – ҳаммасини биргина ўйин "бир пул қилди". Буни жуда ҳам уятли мағлубият деб таърифласак бўлади. Сон жиҳатдаги устунлик бўла туриб, ғалаба қозона олмадик. "Бухоро" бугун ўз меҳнати эвазига ғалаба қозонди. Ушбу мағлубиятда айбни тўлиқ ўз бўйнимга оламан. Тўғри, илк турда кутилмаган ҳисоблар кўп бўлди, лекин бизнинг ўйин сифатимиз ҳам аянчли бўлди. Тушкунликка тушмаслигимиз керак. Ўйлайманки, жамоамиз ўз ўйинини топа олади.

Бугун жамоамни танимадим. Имкони бўлганда, танаффусда бундан ҳам кўпроқ ўзгаришни амалга оширардим. Тайёргарлик жараёнидаги ўйинимиздан бугун асар ҳам йўқ эди. Таркибимизда тажрибали футболчилар бор ва улар хаяжонланди дея олмайман. Ўзгаришлар ҳам ўзини оқламади. Шу сабаб футболчиларни айбламаган бўлардим. Бугун энг ёмон учрашувимизни ўтказдик", деди "Турон" жамоаси устози.