Бекзод Маматқулов: “Профессионал футзал клуби билан шартномаси бор футзалчининг бошқа жамоада ўйнашини оқлаб бўлмайди”

Футзал федерацияси раҳбари Бекзод Маматқулов Ўзбекистон миллий чемпионатида тўп сураётган футзалчиларнинг турли тижорат мусобақаларида бошқа жамоалар номидан майдонга тушаётган футзалчиларни танқид қилди.

"Ижтимоий тармоқларда Ўзбекистон миллий чемпионатида тўп сураётган футзалчиларнинг турли тижорат мусобақаларида бошқа жамоалар номидан майдонга тушаётганлиги ҳақидаги хабарлар, видео лавҳалар тарқалмоқда. Бу яхши иш эмас. Профессионал футзал клуби билан шартномаси бор футзалчининг бошқа жамоада ўйнашини оқлаб бўлмайди. Айниқса, терма жамоага номзод футзалчиларга ярашмайдиган ҳолат. Айрим ҳолатларни бу ерда очиқлашни хоҳламайман.

Ҳамма нарсанинг чегараси бор, албатта. Мен футзални кеча ёки бугун кўраётганим йўқ. Анча йиллардан буён шу оиланинг ичидаман. Тегишли чора кўрамиз. Тартиб, интизом йўқ жойда ривожланиш, натижа бўлмайди.

Мен аввалги ҳолатларни яхши биламан. Бу лавозимга келганимда айрим жамоаларда  йиллаб ойлик маош олмаган ўйинчилар бор эди. Озми, кўпми ишларни битта тизимга қўйиб бормоқдамиз. Охирги пайтларда клубларда юзага келаётган вазиятлардан тўлиқ хабардормиз. Юқори тизимдаги ислоҳотлар сабаб маошлар ва мукофот пуллари кечиккан бўлса-да, охиригача тўлаб берилади.

Янги мавсумда янги тизимни жорий қилишга ҳаракат қиляпмиз. Жим ўтирганимиз йўқ", деди федерацияси президенти.