Белбоғли кураш бўйича U20 Ўзбекистон чемпионати бўлиб ўтди

Жорий йилнинг 19-22 сентябрь кунлари Наманган шаҳрида белбоғли кураш бўйича (U 20) ўғил болалар ва қизлар ўртасида  Ўзбекистон чемпионати бўлиб ўтди.

Наманган вилояти спортнинг ўйин турлари ва енгил атлетика бўйича ихтисослаштирилган спорт мактабига қарашли "Баркамол авлод" номли манежида ўтган мазкур мамлакат чемпионатида Қорақалпоғистон Республикаси, Тошкент шаҳри ва барча вилоятлардан 250 нафардан ортиқ спортчилар иштирок этишди. 
Мусобақада ўғил болалар эркин ва классик йўналишларда ўнта вазн тоифаларида, қизлар эса эркин йўналишда саккизта вазн тоифасига ғолиблик учун куч синашишди.

Мусобақанинг биринчи куни анъанага мувофиқ  тантанали очилиш маросими ташкил этилди. Мазкур маросимда Ўзбекистон белбоғли кураш федерацияси раиси Равшан Дастиров, федерация бош котиби Абдихалил Маликов,  жаҳон белбоғли кураш ассоциацияси вакили Ральф Файзиев (АҚШ)  иштирок этиб, барча полвонларга омад тилади.

Регламентга кўра, ғолиблар ноябрь ойида Россия давлатида ўтиши режалаштирилган ўсмирлар ўртасидаги жаҳон чемпионатига йўлланмани қўлга киритиши белгиланган ва шу боисдан ҳам мусобақа муросасиз ва шиддатли курашларга бой тарзда ўтди. Икки кунлик қизғин беллашувларда ўз вазн тоифаларида Фирдавс Ҳақназаров (48 кг. Тошкент в.), Ойбек Сиддиқов (52 кг. Фарғона),  Аброр Аҳмаджонов (57 кг. Наманган), Молдир Алимбаева (48 кг. Қорақалпоғистон), Феруза Собирова (52кг.Фарғона) сингари курашчилар барча рақибларини мағлубиятга учратиб, жаҳон чемпионатига йўлланмани нақд қилишди.