“Бенфика” ходимлари “Реал Мадрид”нинг кийиниш хонасига киришга уринди

УЕФА Чемпионлар лигаси плей-офф босқичи доирасида бўлиб ўтган “Бенфика” — “Реал Мадрид” учрашувидан кейин кескин вазият кузатилди. Мазкур баҳсда мадридликлар минимал 1:0 ҳисобида ғалаба қозонди.

Учрашувнинг иккинчи таймида ўйин тез-тез тўхтаб қолди. Бунга сабаб — “Реал” вингери Винисиус Жуниорни рақиб футболчиси Жанлука Престианни ирқчиликда айблади. Бразилиялик футболчи бош ҳакам Франсуа Летексьега мурожаат қилиб, аргентиналик ўйинчи уни “маймун” деб ҳақорат қилганини маълум қилди. Шу пайтда Престианни оғзини футболкаси билан ёпиб олгани ҳам қайд этилди.

Ушбу ҳолатдан сўнг Винисиус мезбон жамоа мухлислари томонидан  ҳуштакбозликка дуч келди.

Шунингдек, учрашувнинг 85-дақиқасида бош мураббийи Жозе Моуриньo четлатилди. Мутахассис Винисиуснинг португалиялик ярим ҳимоячи Ришар Риосга қарши жарима майдони чизиғи ёнида қоидабузарлик қилганига қарамай, огоҳлантирилмаганига кескин эътироз билдирди. Таъкидлаш жоизки, Винисиусда ўша пайтга қадар бир сариқ карточка мавжуд бўлиб, у голни рақс билан нишонлагани учун кўрсатилган эди.

CBS Sports маълум қилишича, финал ҳуштагидан сўнг “Бенфика” ходимлари “Реал Мадрид” жамоасининг кийиниш хонасига киришга уринган. Бу эса томонлар ўртасида жанжал келиб чиқишига сабаб бўлган.