Бердиев жамоаси шу қадар ноқулайки, рақиб 22 йилдан бери ютолмайди ёхуд финалдаги мағлубият "Насаф"га қанчалик таъсир кўрсатди?

5 ноябрь куни ОФК Кубоги финалида Баҳрайнда аламли тарзда мағлубиятга учраган “Насаф” клуби энди Суперлигада қолдирилган иккита ўйинини ўтказиб олади. Бунда ПФЛнинг саъй-ҳаракатларини эътироф этиш керак. Чунки “Насаф”нинг “Сурхон” ҳамда “Қўқон-1912” жамоаларига қарши ўйинларини қайсидир кунларга тўғрилаш лозим эди. Бунда эса улар ФИФА кунларидан фойдаланишга қарор қилдилар.

ПФЛ матбуот хизматининг хабарида айтилганидек, миллий терма жамоамизнинг навбатдаги йиғинидан фойдаланган ҳолда қаршиликларнинг иккита ўйини 11 ва 15 ноябрь кунларига белгиланди. Бунда эса албатта терма жамоа устози билан маслаҳатлашилди ва бу сафар ушбу йиғинга “Насаф” футболчиларидан фойдаланмасликка рози бўлди. Шундай қилиб, “аждарлар”нинг қолиб кетган иккита учрашуви терма жамоанинг йиғини баҳонасида ўтказиб олинади.

“Ал-Муҳаррақ” клубига қарши ўйинда нокаутга учраб қайтган “Насаф” жамоаси ўзига кела олдими? Йирик ҳисобдаги мағлубият футболчиларнинг кайфияти ва руҳиятига қанчалик таъсир кўрсатди? Балки “Сурхон” билан учрашувда бу каби саволларга жавоб топишимиз мумкин. Унгача бор эътиборини ОФК Кубогига қаратган “Аждарлар”нинг Манамага катта мақсадлар билан йўл олиб, уйига қуруқ қўл билан қайтгани ёқимсиз бўлгани ҳақиқат. Энди нима бўлади? “Насаф” ўз йўлида давом этади, ОФК Кубоги қўлдан кетди ва бор эътибор ички чемпионатга қаратилади. Рўзиқул Бердиев жамоаси ҳозир Суперлига ва Кубок баҳсларида ўз олдига қўйган мақсади сари курашни давом эттиради.

Чемпионатда бошқалардан иккита кам ўйин ўтказган “Насаф” энди қисқа муддат оралиғида қолдирилган учрашувларини ўтказиб, бошқа клубларга ўйинлар сони бўйича етиб олади. Юқорида таъкидлаб ўтганимиздек, 11 ноябрь куни “Сурхон” жамоаси билан беллашади. Қаршиликлар эътиборни ушбу ўйинга қаратган. ОФК Кубоги финалидаги мағлубиятдан кейин “Насаф”нинг қандай ўйин кўрсатиши биз учун ҳам қизиқ.

Маълумот ўрнида айтиб ўтмоқчимизки, қаршиликлар 22 та учрашувда 40 очко билан мусобақа жадвалида 4-ўринда. 24 тадан ўйин ўтказган “Сўғдиёна” билан АГМК 43 ҳамда 46 очко билан 2- ва 3-ўринларда боришяпти. Бир қарашда “Насаф”нинг иккита қолдирилган ўйини борлиги учун уларда совринли ўринлар учун имконият бир мунча яхшироқдек кўриняпти. Лекин унутмаслик керакки, рақибларга ҳам очколар жуда муҳим. Масалан, “Сурхон” Суперлигада қолиш учун курашяпти ва ҳали бу йўлда мақсадига эришиб бўлгани йўқ. Термизликлар ҳисобида 23 та учрашувда 21 очко бор ва 10-поғонадан жой олиб турибди.

Албатта, “Сурхон” – “Насаф” жуфтлигида фаворит қаршиликлар ҳисобланади. Буни ҳамма яхши билиб турибди. Агар “Сурхон” бу ўйинда бир нима қилиб ғалаба қозонадиган бўлса, Суперлигада қолиш вазифасини деярли бажаради ва ўзини анча енгил ҳис қилиши мумкин. Аммо “Насаф”га ҳам уч очко муҳимлигини инобатга олганда, ўйин жуда муросасиз ўтиши аниқ. Кўпчилик эса Рўзиқул Бердиев жамоасининг ғалабасига ишоняпти.

“Сурхон” – “Насаф” ўртасидаги олдинги ўйинлар статистикасига келсак, бўлажак баҳс жамоаларнинг 22-тўқнашуви сифатида тарихдан жой олади. “Сурхон” учун “Насаф” шу қадар ноқулай рақибки, 1999 йилдан бери қаршиликларни мағлубиятга учратиш йўлини топа олмай келяпти. “Сурхон” 21 та учрашувда бор-йўғи бир марта “Насаф”ни ютган холос. 1999 йилнинг 16 ноябрь куни ўз майдонида рақибини 3:1 ҳисобида енгган. Ушбу ғалаба “Сурхон” учун ҳозирча биринчи ва охиргиси бўлиб турибди. Бундай ғалабалардан “Насаф”да 17 та бор. Шу йилнинг биринчи даврасида Қаршидаги учрашувда мезбонлар рақиб дарвозасига оз эмас, кўп эмас, жавобсиз нақд 6 та гол урди. Ўтган йилги баҳсда эса “Насаф”даги ўйинда майдон эгалари термизликларни 5:0 ҳисобида тор-мор келтирган. Икки сафардан бери ўта йирик ҳисоблар билан устун келаётган “Насаф” бу гал ҳам ушбу ёқимли анъанасини давом эттирармикин? Дарвоқе, бу жамоалар ўртасидаги учрашувларда дуранглар сони 3 та. Аҳамиятлиси, охирги дуранг 2000 йилги мавсумга тўғри келади ва ўшанда 3:3 ҳисоби қайд этилганди. Хуллас, “Сурхон” 22 йилдан бери “Насаф”ни мағлуб эта олмаяпти. Ўзаро баҳсларда термизликлар 15 та, қаршиликлар эса 58 та гол урган. Статистикада катта устунлик шубҳасиз Бердиев жамоасида.

Дарвоқе, куни кеча ЎФА томонидан футболдан четлатилган “Сурхон”нинг собиқ сардори Асрор Ғофуров Бангладеш чемпионатига кўчиб ўтди. У “Сурхон” билан октябрь ойида шартномани бекор қилган ва фаолиятини яна легионер сифатида давом эттиришни маъқул кўрди.