Бернарду Силва мундиалда Ўзбекистон билан хотиржам ўйнамоқчи

“Манчестер Сити” сардори ва плеймейкери Бернарду Силва яқин вақт ичида келажаги бўйича муҳим қарор қабул қилиш ниятида.

Ҳозирча бир нарса аниқ, яъни футболчи мавсум якунланганидан кейин эркин агент сифатида “шаҳарликлар” сафини тарк этади.

31 ёшли португалияликка асосий даъвогарлар “Барселона” ва “Ювентус”бўлиб турибди. Бернарду Силва “Бенфика” таклифини қабул қилмади. Унинг олдида бошқа вариантлар ҳам пайдо бўлиши кутилмоқда.

- Мен янги клубим бўйича қарорни жаҳон чемпионати бошланишидан олдин қабул қилмоқчиман. Терма жамоа йиғинига келганимда келажагим аниқ бўлишига умид қиламан, - деди Бернарду Силва Canal 11 телеканалига берган интервьюсида.

Португалия миллий жамоасининг бўлажак мундиалдаги илк учрашуви АҚШ вақти билан 17 июнь куни бўлиб ўтади. Уларнинг рақиби Конго Демократик Республикаси терма жамоаси бўлади.

Кейинроқ Роберто Мартинес шогирдлари Ўзбекистон ва Колумбия терма жамоаларига қарши ўйнайди.