"Бинокор" ёшлар жамоаси Қирғизистондаги халқаро турнир финалига чиқди

Мазкур мусобақани ёш хоккейчиларимиз "Рига" жамоаси вакиллари устидан қозонилган ғалаба (2:1) билан бошлашди. Иккинчи баҳсда эса "БЎСМ-2" клубига имконият бой берилди - 3:5.

Шундан сўнг Алишер Азимов шогирдлари Россиянинг "СКА-Стрельна 2017" (5:2), Чехиянинг "Шутер Йиндржихув" (4:3) клубларини мағлуб этиб, мусобақанинг ярим финал босқичига йўл олишди.

Финал остонасида ёш "бинокорчилар" АҚШнинг "USA Select" клубидан устун келиб (2:1), финал йўлланмасига эга чиқишди. Ҳал қилувчи баҳсда эса ҳамюртларимизга Бишкекнинг "БЎСМ-1" жамоаси рақиблик қилади. Ушбу беллашув эртага бўлиб ўтиши режалаштирилган.

Бундан ташқари, "Бинокор" раҳбарлари Санкт-Петербургнинг "СКА-Стрельна 2017" хоккей клуби билан ўзаро ҳамкорлик қилиш, ўртоқлик ўйинлари ва йиғинлар ташкил этиш бўйича келишувга ҳам эришганлигини алоҳида эътироф этиш жоиз.